Alpitour

Dae Wikipedia, s'entziclopedia lìbera.
Jump to navigation Jump to search

Alpitour Spa est una sotzietade italiana chi òperat in su domìniu de sas bagàntzias organizadas, fundada in Cune in su 1947, dae un’ufìssiu minore intregadu a s’amaniadura de servìtzios turìstigos.

Istòria[modìfica | modìfica su còdighe de orìgine]

Su primu nùmene de s’impresa est Alpi: s’atividade sua est cunsagrada mescamente a organizare sos trasportos, in trenu o in purma, de filadas mannas in s’ocasione de eventos importantes, che s’Annu Santu in Roma o su Carrasegare de Nitza.

Bator annos a pustis, in su 1.951, s’impresa lograt sa rapresentadura de sa LAI (Lìnias Abiàtigas Italianas, s’Alitalia de como).

In su 1960, naschet sa fòrmula de su biazu “totu incrùdidu”, chi dat sa possibilidade a sos turistas de bisitare sas logalidades europeas prus suzestivas. In su logo de Alpi, pro sa prima bia cumparet su cau, e in su 1967 su nùmene de s’impresa devenet ufissiarmente Alpitour.

In su 1968, Alpitour otenet un’àteru primadu: pro sa prima bia, difatis, un’elaboradore informàtigu intrat a un’impresa turìstiga italiana, mezorende s’efissièntzia e sa lestresa organizativa.

In sos annos setanta, Alpitour inàgurat sa custumàntzia de bolos nolitados deretos chirru a sa logalidades printzipales de su Mesuterranu e de s’Atràntigu Orientale. S’Ispanna e sas Canàrias si faghent sizìbiles in pagas oras de bolu, permitende a sos crientes de isseberare bolos ispetziales sena trànsitos intermèdios e cun una limitadura cussideràbile de sos costos.

In sos annos otanta, Alpitour amprat in manera progressiva s’oferta sua pròpia, annanghende a s’afantallu suo destinos a distàntzia longa e pubrighende, galu una bia sa prima in su livellu nassionale, unu catàlogu cunsagradu intreamente a s’Itàlia.

Finas sas seas operativas aumentant, dae Milanu a Roma, dae Pàdua a Bolonna, finas a sizire su logu istranzu cun s’abertura de sos ufìssios in Tenerife, Grandu Canària, Minorca, Ibiza, Maiorca.

In su barigare de sos annos noranta, leat sa tzucada s’evolvidura noa de Alpitour: pro s’imponner in su mercadu grobale, parende fronte a sos bisonzos de sos turistas noos in su mundu intreu, s’impresa cunesa si mudat in unu grupu internassionale mannu.

S’isvilupu naradu est possibilitadu dae Exor, sa cartera de investimentos de su grupu Agnelli, cun partetzipaduras chi andant dae su grupu automotive Fiat a su setore bancàriu.

In su 1992, Exor còmporat sa prima partetzipadura de minoria in Alpitour, aumentende peri sos annos sa cuota sua de zestione, finas a nche cromper in su 2001 a su cuntrollu de su 100% de su pachete de assiones. Parallelamente, in su 1998 sa cartera perfetat finas s’achisidura de Francorosso.

Sa fundidura intre sos duos operadores mannos nassionales in su setore turìstigu cunzughet sa nàschida de su Grupu Alpitour: unu grupu de perfilu internassionale organizadu in ses partziduras operativas mannas (Tour Operating, Aviation, Hotelencu, Distribuidura, Incoming, Incentive & Eventos), in intro de sas cales onzi marcu est ispetzializadu in sa dispensadura de una gamma pretzisa de servìtzios a su mercadu ozetivu suo pròpiu.

In su 2005, fiat istadu istipuladu unu cuntratu cun sa cumpanzia abiàtiga salernesa Airsal, tando in pessu custituìda, chi diat aer realizadu bolos nolitados pro Alpitour e àteros turoperadores dae sos abioportos de Malpensa e Bolonna chirru a Màlaga e Ibiza, in prus de àteros destinos mesuterranos. Airsal, cun s’intentu naradu, aiat nolitadu dae British Aerospace duos abiomòbiles Bae 146/200. Su cuntratu cun Alpitour totalizaiat 4 milliones de euros e prebidiat su trasportu de passizeris finas a su 12 de cabudanni de su matessi annu. Sa cumpanzia abiàtiga, sende gasi, aiat fatu faddimentu bator meses a pustis.

In su 2008, su Grupu lantzat Alpitourworld.com, su portale e-commerce in ue si podent comporare sas bagàntzias de Alpitour, Francorosso, Villaggi Bravo, Volando e Jeans.

Su 23 de nadale de 2.011, Exor annùntziat sa tzessura de Alpitour a unos cantos fondos de investimentu faghende referèntzia a Wise Sgr e J. Hirsch & co. e àteros sòtzios finantziàrios, pro unu totale de 225 milliones de euros.