Ammuntadore

Articulu in nugoresu

Su Ammuntadore/-i o Ammutadori (dae su verbu ammuntare/-ai) est unu essere de sa mitologia sarda chi diat còrfere a sa zente cando fachet sònnu malu (est a nàrrer, cando fachet ammuntadùra).

Berbu contra a s'Ammuntadore

Si credìat chi fit s'imbìdia a cajonare s'arribu de s'Ammuntadore. Pro nche lu catzare, si nabat su berbu chi sichit:

« Sa rughe 'e Santu Valentinu ereta ereta che filu e che filu ereta mal'apat chie m'oretat chie m'at a oretare iscuru apat de male iscuru che in bucca origas de istuppa istuppa origas de ispagnola totu che essa foras francu s'evangelista chie m'istat in cabita in cabita 'e letu bonu est Santu Larentu Santu Larentu est bonu chi faghet su sonu chi sonat che puddu s'Ammuntadore l'agaten abbuvuddu. »

Istòria e testimònzos

Si at meda testimònia de sa credentzia de custos esseres e si nde at chistionau dae meda; pro carchi istudiosu aìat picau pede a pustis de su 241 a.C., ovverosiat a pustis chi sos anticos romanos aiant conchistàu sa Sardigna, ma pro ateros galu esistiat ja dae prima. A si pòmpiare sos sìntomos chi sas "vitimas" riportàbant (pressione e dòlu a su pèttus, comente chi s'ammuntadore las teniat presas istàndelis firmu in supra e impedìndelis de mògher pòddiche, visiones orrorosas e adderettùra sa morte), si diat poder iscumbatare chi siant sas criaturas de su note chi sos latinos, chind un'ateru lùmen, mutìant Incubi (Incubus a singulare) e, in sa versione femenìna, Succubi (Succubus a singulare).

Chin su tempus, a dontzi modu, s'Ammuntadore at pèrdiu tottu su caratere de pantasima e ispìritu de su nòte chi teniat in favore de una narratzione prus a curtzu a cussa cristianu-cattolica, chi lu at postu a pare chin su demoniu identificàndelu de su tottu chin issu, tantu chi fint nàschias precadorias pro che lu catzare. Mancari chi sos zovanos oje bi credant pacu, galu fachet a intèndere carchi contu in supra sos ammuntadores dae sos antzianos.

Teorias issientìficas

S'Ammuntadore si podet fatzilmente pònner a pare chin sas esperientzias de sa paralisi in su sonnu chi si accumpanzat a allutzinadùras ipnagogicas.