Brigadas Rujas

Dae Wikipedia, s'entziclopedia lìbera.
Bandera de sas Brigadas Rujas

Brigadas Rujas (fatu fautu incurtzadu a BR) est su nùmene de un’organizadura terrorista italiana de manca istrema, chi si fiat custituìda in su 1970 pro propagandare e isvilupare sa pelea armada rebolussionària pro su comunismu.

De raighina marxista-leninista, fiat istadu su grupu terrorista de manca prus mannu, prus numerosu e de dura prus longa de sa segunda pustisgherra in s’Europa Ponentesa.

De acordu cun sos contos de unos cantos militadores printzipales, sa detzisura de imprender sa pelea armada la diant aer leadu in unu cumbèniu chi si fiat isvilupadu in s’austu de su 1970 in sa logalidade de Pecorile, comuna de Vezzano sul Crostolo (Rezu Emìlia), a su cale aiant partetzipadu unos chentu delegados de s’istremismu de manca. A s’organizadura fiant intrados sos militadores de su gasi naradu “grupu rezanu”, intre sos cales Alberto Franceschini, sos de su grupu aproghilende dae s’Universidade de Trentu, intre sos cales Renato Curcio e Margherita Cagol, e sos de su grupu de operarzos e impreados de sas fàbrigas milanesas Pirelli e SIT-Siemens.

Sas primas assiones rebindigadas comente “Brigadas Rujas” remontant a su 1970 e fiant sighidas cun su màssimu de s’atividade intre su 1977 e su 1980. A pustis de una fase de gasi narada “propaganda armada”, cun atentados demustrativos in intro de sas fàbrigas e sechestros de aderetadores industriales e zuighes, intre su 1.974 e su 1.976 fiant istados detènnidos sos brigadistas printzipales de su grupu orizinale. Dae cussu mamentu, sa deretura de s’organizadura fiat colada a sos brigadistas de su cumitadu isecutivu nou, in ue aiat leadu unu rolu determinadore Mario Moretti, chi aiant potentziadu in manera cussideràbile sas capatzidades lozìstigas e militares de su grupu, isterrende s’assione, addae de sas tzidades de su nordu, finas a Roma e Nàpule, e murtiprighende sos atacos semper prus crueles contra a polìtigos, zuighes, industriales e fortzas de seguràntzia.

Forografia de Aldo Moro durante su sechestru dae sas Brigadas Rujas

Mamentos de cùcuru de s’atividade de su grupu fiant istados s’impostada de via Fani e su sechestru de Moro in su beranu de su 1978; cun su recatamentu dramàtigu de Aldo Moro, sas Brigadas Rujas fiant partas a tretu de infruer in modu detzisivu a subra de s’echilibru polìtigu italianu e de poder soluvertare s’òrdine democràtigu de sa Repùbriga.

S’organizadura fiant intrada a crisis in sos primos annos otanta pro s’isulamentu suo irrevessàbile in intro de sa sotziedade italiana e fiat istada destruìda progressivamente gràssias a sa capatzidade creschidora de cuntrastu dae bandas de sas fortzas de seguràntzia e finas de s’aproadura de una leze de s’Istadu italianu chi cuntzediat minimonzos notàbiles de pena a sos membros chi diant aer reveladu s’identidade de àteros terroristas. In su 1987, Renato Curcio e Mario Moretti aiant sinzadu unu documentu in ue decraraiant “terminada” s’isperièntzia de sas BR.

Cunforme a s’incherta de Sergio ZavoliSa note de sa Repùbriga”, dae su 1974 (annu de sos primos mortorzos atribuìdos a issas) a su 1988 sas Brigadas Rujas ant rebindigadu 86 mortorzos: su prus de sas bìtimas fiant azentes de polima e carabineris, zuighes e òmines polìtigos. A custos cherent annantos sos ferimentos, sos sechestros de pessone e sos isrobatòrios realizados pro “finantziare” s’organizadura.

Renato Curcio at carculadu chi 911 pessones siant istadas inchertadas pro aer formadu parte de sas BR, a sas cales cherent annantas àteras 200-300 pessones incrùdidas in sos diferentes grupos armados chi si fiant ispicados dae sas BR (Partidu Comunista Cumbatidore, Unidades Comunistas Cumbatidoras, Partidu Gherrilla, Colunna Walter Alasia).

Sa numenadura “Brigadas Rujas” est torrada a cumparrer, a pustis de annos de ausèntzia, in su 1999, pro rebindigare atentados crueles noos in su tempus dae su 1999 a su 2003.