Convenience store

Articulu in logudoresu

Convenience store in Fukushima, Giappone.

Unu convenience store (faeddu inglesu chi bolet prus o mancu nàrrer "buttega a discassu") est una butteghitta chi bendet medas ozettos de impreu de dontzi die, subratottu cosa de mandigare e buffare, ma poden esser puru tzigarros, fozu de paperi, liberos, giogos, CD e / o DVD audio e video, cosmeticos e gai sighinde.

Sos convenience stores sun a diversu dae sas atteras buttegas, ca custas sun abberu minores, non si poden agattare in logu de campagna e non serbin pro si impreare in logu de cussas prus mannas: prusaprestu, faghen appuntu de buttega a ue si podet andare pro comporare una cosa a discassu, ispetzie pro more de s'ora (sun abertos meda prus a longu de sas buttegas prus mannas, ma in calchi istadu lu sun adderettura bintibàttor oras in subra de bintibàttor), o a si isboligare un'attera casta di servìtziu si sa buttega lu permittit, comente cussu bancariu (a bortas, sos convenience stores sun parte issos etottu de un'attera istruttura, comente un'istatzione de bentzina).

Sos convenience stores, mancari chi su nùmen podat nàrrer atteramente, non sun pro nudda a discassu cando si faeddat de pretzios, chi sun belle semper prus artos de sos chi si poden agattare in atteras buttegas o supermercados, ca in cue sas cosas si las pigan prus pagas e si las comporan dae su grossista a unu pretziu prus artu pro unidade. Peròe, custas buttegas tenden a si fagher unu tzertu balanzu comùncas ca sun medas e cumbenit a bi andare cando sas atteras sun serradas.