Cristina Mazzotti

Dae Wikipedia, s'entziclopedia lìbera.
Jump to navigation Jump to search

Cristina Mazzotti (Erba, 1957 – Galliate, 1975) est una de sas bìtimas de s’anònima sechestros, particularmente ativa in Itàlia e in Sardinna in sos annos setanta e otanta de su sègulu coladu. Cristina fiat istada recatada sa sero de su 26 de làmpadas de 1975 in dae in antis de sa zaga de sa billa de babos suos in Eupilio, logalidade de sa provìntzia de Comu. S’unu de cabudanni de su matessi annu, l’aiant agatada morta: sa pisedda iscuredda aiat tentu una presonia de cadèlios e abatigamentos, de subradosas de essitadores misturados cun atranchilladores.

Cristina fiat fiza de Helios Mazzotti, un’industriale bussante de su setore de sos tzereales. Sa sero de su 26 de làmpadas, fiat ghirende cun una croba de amigos dae una festa amaniada pro festare s’adelantamentu suo. Sa Mini ghiada dae Carlo su zòvanu fiat cursende su caminu chi zughet a Longone al Segrino, addaghi fiat istada acostazada dae una Giulia e dae una 125. Custrìnghidu a s’arressare, aiat bidu in dae in antis suo un’òmine caratzadu cun sas armas incaradas, chi l’intimaiat de falare. Su malufaghedore aiat pregontadu cale de sas duas piseddas èsseret Cristina Mazzotti. Sa pisedda si fiat presentada cun balentia. L’aiant carrigada a sa Giulia, cando chi un’àteru bandidu liaiat e imbabajolaiat ambos zòvanos in s’automòbile. Sa pisedda chi fiat in sa betura, Emanuela, fiat resèssida a s’alliberare e a dare s’allarma a pustis de addae de un’ora, e fiant istados ammanitzados immediatamente sos cuntrolladorzos de sa polima. Peroe oramài fiat demasiadu a tardu. In sa domo de sos Mazzottis, duncas fiat cumintzadu su caminu de rughe isghelenidore de s’isetu de sos recatadores. Su babu de Cristina, zai patidore de su coro, si fiat intesu male. Fiat istados su primu de sos atacos de coro chi, a coa de pagu tempus, lu diant aer batidu a sa tumba. Sos sechestradores si fiant manifestados sa die in fatu pedende una luissione primadu: chimbemiza milliones de francos betzos. A pustis su mudìmine. Sos babos de Cristina si fiant aderetados a tonos iscramadores a sos recatadores a mèdiu de sos ziornales, crarende s’impossibilidade de agatare una summa gasi, assolutamente in foras de sas possibilidades econòmigas issoro.

In fines, sos sechestradores si fiant manifestados su 15 de triulas e si fiant decrarados prontos a alliberare a Mazzotti a tràmunu de su pagamentu de una luissione de milli milliones de francos. Aiant sighidu àteras dies de isetu calenturale, in s’ìnteri chi s’opinione pùbriga manifestaiat solidariedade a sos Mazzottis e chi una campanna de imprenta ispainada arrimaiat sa causa de un’asperimentu de sas penas chirru a sos chi cumitiant su delitu de sechestru de pessone. A s’agabu de triulas, Helios Mazzotti si fiat zutu a sa prus segreda a un’apartamentu de Appiano Gentile, in ue aiat abonadu sa summa de milli e chimbanta milliones a sos recatadores, retzende a tràmunu s’asseguràntzia issoro subra de s’alliberamentu immediatu de sa pisedda. Peroe sas cosas fiant destinadas a tenner un’evoluidura drammàtiga. A longu de dies e dies, sos babos aiant isetadu s’alliberamentu impromìtidu, e s’unu de cabudanni si nche fiat sizidu su puntu de borta. Gianni De Simone, deretore de su ziornale comesu “L’Ordine”, amigu de sa famìlia Mazzotti, aiat mutidu custos ùrtimos e, cun deligadesa, lis aiat dadu sa noa iscorrioladora: a Cristina l’aiant agatada morta. Sa carena fiat istada imbènnida in unu muntonarzu de Varallino, a curtzu de Sesto Calende. Avèrtidos dae una telefonada, sos carabineris si nche fiant zutos a su logu e, sighende sos inditamentos chi naraiant de istofare a curtzu de unu cotzeddu truncadu, aiant agatadu sa carena de sa pisedda o, naradu mezus, su chi nd’abarraiat. Interrada suta de una pupa truncada, pro ironia màcabra, zaghiat sa pisedda, in istadu adelantadu de iscumponidura. Sa cara fiat pratigamente de non poder recunnoscher, allufiada dae animales e isfigurada. Sa necropsia aiat reveladu che zaghiat in cue dae addae de baranta dies.

Nche fiat essidu a campu unu particulare assuconadore: non si podiat apostivigare si sa carena èsseret istada interrada addaghi sa pisedda fiat morta. S’ipòtesis astrosa chi respiraret galu non fiat istada mai posta a bandas. Unu de sos sechestradores, Libero Ballinari, zai fiat istadu detènnidu in Isvìtzera, in s’ìnteri chi chircaiat de samunare una parte de sa luissione de su recatamentu. Unu deretore onestu de una fizale de banca aiat denuntziadu su tentativu de “innetare” unos noranta milliones de francos italianos e aiat reveladu totu a sa polima ervètiga. Fiat istadu isse chi aiat dadu sas primas noas a pitzos de sa presonia e sa morte de sa pisedda disditzada. Aiat contadu comente Cristina, debilitada dae sa presonia e custrinta a leare dosas massivas a sa prima de essitadores, pro poder faeddare cun babos suos e los cumbincher a pagare sa luissione, e a pustis de atranchilladores, pro nd’asseliare sa boluntade e l’impeìre de si subuzare, aiat agabadu pro s’intender male. Sos recatadores si fiant assuconados e l’aiant trasportada a foras. Sa pisedda, in tempus de su biazu in betura, aiat tzeladu de biver. Aiat decraradu ch’in onzi casu iscunnoschiat sas causas esatas de sa morte: aiat assumbradu sa suspeta chi èsseret istada istrangulada o ochìida a tiru de pistola. Aiat finas dispensadu una mapa de su logu in ue aiant tudadu sa pisedda iscura. Sa polima nche fiat cròmpida a refraigare su grupu de sechestradores bastante a sa lestra. In mesu issoro bi fiat unu grustu imparìvile de iscaminados, zente atraìda dae su dinare fàzile, cun intraduras in su grupu de s’anònima sechestros. Sa banda de sos mortores teniat unu lìderu prus o mancu recunnotu, Giuliano Angelini de 39 annos. Unu tempus coladu intraschiadu de iscadrista e trafigadore de armas, inchertadu pro s’abasatu de Piazza Fontana, antiscundennadu pro emissura de assinnos sena fondos e trampa. A costazos suos bi fiat Loredana Petroncini, un’àteru pessonazu cun tempus coladu difìzile. Fuìda de domo a sos 15 annos, si fiat cojuada cun un’iscaminadu. Grussera e figurosa, fiat istada descrita comente istimadora de sa bida bona.

Un’àtera integradora de sa banda fiat Rosa Cristiano, chi teniat bintisete annos e fiat tosta e cruele. Cumpanza antiga de Angelini, l’aiat acusadu de antismeledare sa morte de Cristina, amministrende-li dosas letales de bàlium. In prus de custu, aiat decraradu chi Angelini etotu aiat cumandadu s’interramentu de su cadàvere in su muntonarzu. Su cumpanzu de Cristiano, cun su cale aiat abertu un’astraderia, fiat Luigi Gemmi, un’àteru fulanu lutzu. B’aiat finas Alberto Menzaghi, pangarzu bauridore. Teniat una panga cun meda traballu, peroe istimaiat sa bida bona. S’ùrtimu chi nche fiat rutu a sa retza de sas fortzas de seguràntzia fiat istadu Antonino Giacobbe, pessonazu de cabale de s’anònima sechestros calabresa. Fiat arribada a die de su primu protzessu, realizadu in Noara. Deghe imputados nch’aiant essidu a campu un’acontèssida assuconadora a beru. Cristina Mazzotti fiat istada mantenta prisonera in una presone istofada in sa terra, e dassada essire su zustu pretzisu pro illorigare sas ancas. A pustis l’aiant tramudada a Galliate, a sa domo de Cristiano. In ie fiat cumintzadu su turmentu de s’amministradura de fàrmagos. A sos sechestradores lis faghiat bisonzu una Cristina ischidada, chi pòderet imbiare missadas a sa famìlia sua. Intre tempus, Helios su babài fiat mortu in Bonas Àeras, su 5 de abrile de 1976, segadu dae un’infartu. Elio, su frade de Helios, diat aer atrogadu chi fiat mortu a dolore. In su maju de su 1977, s’acusa dimandat pro sos sechestradores deghe presonias perpetuadas, cun s’aproadura incundissionada de s’opinione pùbriga e de s’imprenta, bulluzadas dae sas reveladuras iscorrioladoras essidas a campu in tempus de su protzessu. S’otu de maju arribat sa sentèntzia: otu perpetuadas e un’assorvidura, sa de Francesco Gaetani, parente de Antonino Giacobbe, iscausadu gràssias a s’àlibi suo probidentziales, chi aiat aguantadu, de s’internamentu suo a una crìniga. A s’imbesse, non fiat andadu bene pro Antonino su dugone: abaliadu comente unu cumandadore, aiat retzidu sa perpetuada. Penas tostas pro Menzaghi su pangarzu, pro Milan su tzaferru de sa banda e pro Sebastiano Spadaro, su telefonista: dae 23 a 30 annos de regrusura. Una sentèntzia retzida cun satisfatura dae totus. Sa sentèntzia de su de duos grados, a su contràriu, aiat minimadu sas penas, cando chi sa definitiva aiat reapostivigadu totu comente detzìdidu in su primu gradu. In su 1.980 aiant cundennadu a sa presonia perpetuada finas a Libero Ballinari, su chi aiat interradu materiarmente a Cristina s’iscuredda. Aiat tentu unu protzessu autònomu, sende chi fiat impresonadu in unu penadorzu de Luganu. In tempus de sos protzessos, sas pessonalidades bariadas de sos imputados nche fiant essidas a pizu de aba in manera impiedosa. Zente sorida e priogosa, fassinada unigamente dae su dinare ch’isperaiant lograre dae su sechestru. Zente cun in palas unu tempus coladu fatu de biolèntzia, de bidas bìvidas a làcanas de sa leze. O finas zente sena balores morales de zenia peruna. Che Cristiano, chi aiat cuntatadu un’empòriu pro comporare soda càustiga, chi deviat servire a fagher iscumparrer sa carena de Cristina; ch’in s’apartamentu in subra de sa zeladeria retziat unu pagu demasiada bìsitas, balanzende evidentemente in manera còmoda su dinare chi li faghiat bisonzu pro si machillare e si bestire bene, sos apentos suos. Che Angelini, chi aiat contadu de esser istadu a sa prima cundennadu a morte dae s’anònima calabresa e posca grassiadu. Che Menzaghi, su pangarzu istimadore de su pistatzu, chi cun probabilidade aiat tentu unu rolu finas in su sechestru de Tullio De Micheli, de 60 annos, isvanèssidu a s’àera fina a pustis de su recatamentu. Che Achille Gaetani, chi diat aer proadu a ghetare a subra de Menzaghi sas reponsabilidades de su sechestru, decrarende chi non l’aiat cuntzìbidu, si nono chi b’aiat leadu parte petzi in modu chirrale.