Death Note

Dae Wikipedia, s'entziclopedia lìbera.


Articulu in nugoresu

« Su lumen de s'esser umanu chi b'at aer iscrittu in custu cuadernu sich'at a morrer »
(Prima regula de su Death Note)
« The human whose name is written in this note shall die »
(Versione orizinale in limba ingresa)

Death Note (デスノート , Desu Nōto) est unu manga chi Tsugumi Ōba b'at tentu s'idea e l'at iscrittu paris chin Takeshi Obata pro sos disinnos. In Giappone Weekly Shōnen Jump l'at prubicau dae su mese de Nadale in su 2003 a su de maju in su 2006, e a pustis colliu in 12 tankōbon. Pro cantu pertocat s'istadu italianu, su manga l'at prubicau imbetzes Planet Manga (Panini Comics) dae su mese de Sant'Andrìa in su 2006 a su de Capidanne in su 2008.

S'istoria contat de Light Yagami, unu pitzoccu de iscola superiore a primu e de s'universidade a pustis, chi aiat atzapau unu cuadernu de lumene Death Note, capassu de soprannaturales poderes, ghettau a terra dae unu shinigami (deus de sa morte) muttiu Ryuk. S'ozetu daet a chie lu impreat su podere de ch'isperdere chiesisiat, petzi ponendebi su lumen in intro in su mentras chi si bi immazinat sa cara de chie si cheret mortu. Light, chi lu timet a su cumintzu, cheret impreare su Death Note pro che bocare dae tottu sa terra sos criminales e fundare unu mundu novu inube non b'apat prus male, ma s'interventu de L, unu fentomau detective privau, li orroghinat sa trassa.

Su manga est istau unu sutzessu a libellu mundiale, tantu chi b'an fattu dae cuddu paritzas atteras operas, comente un'anime de 37 puntadas, duos romanzos e fintzas videojocos.

Su titulu orizinale giapponesu est iscrittu a carattere mauschìnu, apparende duncas DEATH NOTE. Custa caratteristica peroe, foras de su Giappone, non l'at mantesa nemos in neddube, figurande semplicemente Death Note.