Disacatu abiàtigu de Linate

Dae Wikipedia, s'entziclopedia lìbera.


Articulu in logudoresu

Mapa de sa dinàmica

Su disacatu de Linate, cun unu contu finale de 118 bìtimas, est s’intzidente abiàtigu prus grae acontèssidu carchi bia in Itàlia: pro su pertocat sas cullisuras in su solu ebia, est superadu in su mundu petzi dae su disacatu de Tenerife de 1977.

S’8 de santugaìne de su 2001, a sas otu oras e deghe logales, unu McDonnell Douglas MD-87 de sa cumpanzia abiàtiga SAS rezistradu SE-DMA, in sa fase de decollu dae s’abioportu de Milanu-Linate, fiat intradu in cullisura cun unu Cessna Citation CJ2 intradu erradamente a sa pista pro neghe de sa neula tìpida.

A pustis de s’addobada, s’MD-87 non fiat resèssidu a cumpretare sa fase de decollu e si fiat tzacarradu contra a su fraigu ammanitzadu pro s’ischerriamentu de sos bagazos postu in su perlongamentu de sa pista.

Su tzocu e su fogu chi si fiant ispossiados posteriormente no aiant dassadu sarvamentu a sos ocupadores de ambos bolarzos, ne a bator ischerriadores de bagazos chi fiant traballende in su departamentu. Unu chintu incarrigadu de bagazos si fiat sarvadu, sende s’ùnigu subrabìvidu a su disacatu: est chistione de Pasquale Padovano, uscradu belle in s’integralidade de sa carena sua.

Non fiat barigadu nemancu unu mese dae s’atacu terrorista contra a su World Trade Center de Noa Iorcu, e pro annanghedura fiat sa die de cumintzu de sa gherra in Afeganistanu: medas pessones, a sa prima, aiant pessadu chi pòderet esser chistione de un’atentadu, peroe bastante cantu luego si fiat fatu craru chi si trataiat de un’intzidente.