Gay Pride

Dae Wikipedia, s'entziclopedia lìbera.


Artìculu in LSC

Gay Pride in Pratza Taksim, Istanbul

Sa die internatzionale de su LGBT Pride, connotu fintzas cumente a Gay Pride o sceti Pride, est unu eventu chi sa comunidade LGBT e queer cuncordat cun sa punna de pedire agualidade e arrespetu pro sa sa colletividade issoru.

Su Pride s'afestat dònnia annu a inghìriu de su 28 de làmpadas pro amentare is iscussertos de su Stonewall Inn (New York City, Istados Unidos de Amèrica) de su 1969, inue persones transessuales, drag e omosessuales ant reatzionadu imparis contra a su sistema de persecutzione de sa politzia e de su gobernu.

Posca de is abolotos de Stonewall, is persones LGBT de New York ant cumentzadu a atuare cumente comunidade, incumentzende sa temporada mundiale de su movimentu de liberatzione omosessuale chi sighet a die de oe.

Su cuntzetu de base de "LGBT Pride" est chi nemos si diat dèpere brigungiare de su chi est, calechisiat su sessu, s’Identidade de genere o s’orientamentu sessuale suo. 

Su fueddu ‘’pride” (orgòlliu, balentia) bolet nàrrere 'autoistima o istima chi dònnia persone depet tènnere de issa e totu cumente a dìnnia de respetu o cussideru'. 

In Sardigna, a pustis de medas annos de atividade de is sòtzios sardos Movimento Omossessuale Sardo e ARC (e àteros) e de manifestatizones contra s'omofobia (die chi s'amentat a s'acabu de maju), s'at ordingiadu su primu Pride in su 2012 in Casteddu cun su nùmene Cagliari Pride.

Dae du 2013 su Pride est ordingiadu dae unu cordinamentu de sòtzios sardos e pigat su nùmene de Sardegna Pride.

In s'editzione de su 2018 s'ant registradu prus de 30.000 persones in sa parada de Casteddu.