Ischirolu

Dae Wikipedia, s'entziclopedia lìbera.
Jump to navigation Jump to search
Ischirolu

S’ischirolu (Sciurus vulgaris) o ardilla, ischilu, sòrighe de padente (est a evitare s’italianismu “iscojatolu”) est unu rosigadore de medidas mèdiu-minores (40 cm.) de sa famìlia de sos issuritos, chi cumprendet medas àteras ispètzias che sa marmota e su cane de sa praderia.

In beridade, a sa zènia “Sciurus” e a sos parentes suos prus probianos pertenent diferentes ispètzias de animales identifigadas dae su nùmene comunu de “ischirolu”. S’ispètzia prus cunnota est tzertamente s’ischirolu europeu, ruju cun su pilu de sa petorra prus craru. In Itàlia, sa bariedade ruja arribat finas a sa Tùssia e a s’Ùmbria. Prus a su suddu, est sustituìda dae sa bariedade niedda, caraterìstiga de sos padentes de sos Apenninos, dae s’Abrutzu a s’Aspromonte (peroe si nd’agatat una pobuladura minore finas in Villa Ada, in su tzentru de Roma, a no cunfunder cun sas tàmias introduìdas dae s’òmine).

S’ischirolu est un’animale arvurìgulu, brincadore capatzu, e pro custu est ligadu a sos ambientes litales. S’alimentat a nughe, lande, cugumeddu e frùtora, de sos cales si nde faghet iscortas cussideràbiles in tempus de s’istajone istiale, magasinende-los a rebustos cuados bene, pro nde fagher impreu a pustis in sos tempos de iscassia (francu chi si nd’ismèntighet, cullaborende in custu casu a s’isparminadura de sos fundos). Sos apresadores printzipales de s’ischirolu sunt s’ansile, su gatu agreste, e ispètzias bariadas de francudos.