Pinkwashing

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Durante su Gay Pride de Tel Aviv de su 2013 su colletivu de militantes anarco-queer "Mashpritzot" aiat protestadu contras de su pinkwashing de Israele.

Su Pinkwashing (dae s'inglesu pink, rosa, e whitewash, isbiancare o acuguddare), literalmente limpiadura rosa, est unu trèmene chi in su cuntestu de is deretos LGBTI si referit a sa bariedade de istrategias polìticas e de marketing miradas a sa promotzione de istitutziones, paisos, persones, produtos o siendas, apellende a sa cunditzione issoro de simpatizadores LGBT cun s'obietivu de si fàghere atinare che progressistas, modernos e tollerantes.

Su trèmene fiat istadu in òrigine bogadu a pitzu dae sa Breast Cancer Action pro identificare sas aziendas chi asseguraiant apoderare is fèminas cun càncaru de sinu, mentras in realidade punnaiant a otènnere balàngios majores e megiorare s'imàgine issoro comente impresas assotziende a su nèmene issoro publitzidades pro càusas benèficas.

Sa paràula, est de pònnere a costàgiu cun is dinàmicas e is crìticas tìpicas de su greenwashing, naschet sighende sas istigas de su greenwashing matessi. Su cuntzetu de pinkwashing fiat nàschidu comente crìtica, chirchende de ghetare iscrètia subra is intentos reales de unas cantas initziativas chi antimes de èssere mòvidas dae interessos sientìficos efetivos, punnaiant a atirare s'atentzione de is consumadores chi, cherende sustentare sa càusa benèfica, finiant comporende is produtos de siendas dislindadas.

Est duncas àterentantis usada pro isterridura de significadu critichende una trama de comunicatzione fundada subra sa posa de bonu coru cara a personas LGBTI a banda de una impresa o una entidade polìtica chi intentat de mudare s'imàgine e sa numenada sua in sentidu progressista, tolerante e abertu, cun s'obietivu de facto cuadu de s'ispaniare su mercadu o de atirare acunstentimentos.

In custu sentidu s'espressione est fintzas istada impitada pro fàghere relatu a una suposta innetadura de imàgine de s'istadu de Israele chi, promovende sa populatzione LGBTI sua, istraviat sa violadura sistemàtica de is deretos umanos de sa populatzione palestinesa segundu s'opinione de carchi mitza​. In custu casu projetende s'aparèntzia de unu territòriu gay-friendly, sa populatzione LGBTI e liberale diat arribare a si sentire identificada cun is positziones polìticas de s'Istadu (omonatzionalismu), partetzipende a s'islamofobia istitutzionalizada, segundu su cunsideru chi sa populatzione musulmana est in manera netzessària omòfoba o discoidare de sa discriminatzione padèssida in su paisu cosa sua.