Pintxo

Artìculu in LSC

Pinchos espostos longu su bangu de su bar

Pincho o pintxo (in limba basca) est unu tèrmine usadu in su tzentru-Nord de s'Ispagna, pro sa pretzisione in su Paisu Bascu, in Navarra e in Castiglia e León, pro identificare unu petitu chi acumpàngia s'aperitivu. Sos pinchos sunt paragonabiles a sas tapas ispagnolas e sunt in totu simigiantes a sos cicheti venetzianos. Su pincho est costituidu dae una fita de pane cun subra unu o prus ingredientes (sos prus difùndidos sunt presutu, casu, pische, olias, tortilla de patatas, piberones, etc.).

Su nùmene derivat dae su fatu chi traditzionalmente su pincho fiat tentu impare dae unu ispuligadentes mancari oe custa caraterìstica no est semper rispetada. Sos pinchos sunt unu pratu tìpicu de s'arte de coghinare basca e si tastant comente aperitivu acumpangados cun una tassa de binu nieddu (naradu txikito in limba basca) o de birra (zurito in limba basca).

Sos pinchos, a s'ora de s'aperitivu, sunt espostos longu totu su bangu de su bar, de manera chi ogni cliente potzat pigare su chi bolet, in manera anàloga a comente sutzedit in sos bacari de Venètzia e a sas àteras tapas ispagnolas. Curiosu est su fatu ca in locales medas si pagat su contu in base a su nùmeru de ispuligadentes abarrados subra de su pratu cun su chi sos pinchos benint batidos a sa mesa.