Rivolutzione

Artìculu in LSC

Sa Libertade ghiende a su pòpulu, Eugène Delacroix

Su trèmene rivolutzione (de su latinu revolutio -onis, "abolotu, furriada", derivadu dae su verbu revolvĕre "bortulare") in su significadu prus ampru inditat calesisiat mudàntzia radicale in sas istruturas sotziales comente cudda operada pro esèmpru de sa rivolutzione industriale, de cudda tecnològica o in piessignu de cudda culturale comente s'auguraiant sos illuministas in su de 18 sèculos cun sa redatzione de s'Encyclopédie:

«Custa òpera at a prodùere tzertamente, cun su tempus, una rivolutzione in sos ànimos e deo ispero chi sos tirannos, sos opressores, sos fanàticos e sos intollerantes non tèngiant a nde tràere avantàgiu. Amus a àere torradu unu servìtziu a s'umanidade.»

In sa filosofia polìtica est s'ideale de sa realizatzione istòrica de unu càmbiu radicale, ispiradu dae motivatziones ideològicas, in sa forma de guvernu de unu istadu cun mudàntzias profundas de totu s'istrutura sotziale, econòmica e polìtica.

Sa rivolutzione comente fenòmenu istòricu est unu protzessu lestru o de longa durada, non semper violentu, cun su cale classes o grupos sotziales, prus o pagu ampros, si rebellant a sas istitutziones a su pòdere pro las modificare e determinare unu ordinamentu polìticu nou.