Roberto Dinamite
Carlos Roberto de Oliveira, prus cunnotu a paranùmene de Roberto Dinamita (Duque de Caxias, 13 abrile 1954) est unu fubaleri antigu brasilianu, deputadu de s'Istadu de Rio de Janeiro pro su PMDB, gasi etotu che presidente atuale de su Vasco de Gama.
Est cussideradu dae sos reziradores s'ìdolu prus mannu de su Vasco, in ue aiat zogadu pro 21 de sos 22 annos suos comente profissionale, resurtende su mezus goladore de s'istòria de su crube, cun 711 golos, e s'atreta cun su nùmeru prus artu de partidas disputadas, gasi che su mezus bomberi de s'Istàdiu de São Januário, cun 184 golos. Fiat istadu cussideradu, in una botadura intre 240 pessonalidades ligadas a su Vasco amaniada dae su chidàriu isportivu Placar, comente su mezus zogadore de s'istòria de su Vasco. In prus de custu, paris cun Pelé e Rogério Ceni, est s'ùnigu zogadore de su fùbalu brasilianu chi apat disputadu prus de milli addòvios in sa matessi echipa. Dinamita si ponet in craru aguarmente pro esser su mezus bomberi de s'istòria de su Campionadu Brasilianu (190 golos) e de su Campionadu Carioca (279 golos). S'IFFHS l'abàliat comente su de chimbe goladores prus mannu de su fùbalu mundiale in su campionadu nassionale de prima partzidura, cun 470 golos in 758 partidas.
Pro su chi pertocat s'internassionale brasiliana, Roberto fiat istadu cumbocadu a su mundiale de 1978 in Arzentina, marchende tres golos: unu cun s'Àustria in sa prima runda, e duos contra a sa Polònia in sa segunda. Aiat logradu sa cumbocadura finas a su mundiale posteriore de 1982 in Ispanna, peroe sena esser impreadu carchi bia dae Tele Santana s'assussadore brasilianu.