Spoon River Anthology
Limba Sarda Comuna. Abbàida sas àteras bariedades gràficas:
Spoon River Anthology est una regorta de poesias in versu lìberu iscrita dae su poeta istadunidensu Edgar Lee Masters e publicada intre su 1914 e su 1915 in su Mirror de Saint Louis. Ònnia poesia contat, in forma de rètulu de làpide, sa vida de is bividores de sa bidda immaginària de Spoon River (nùmene chi benit dae unu riu chi esistit a beru e curret acanta de Lewistown, tzitade de residèntzia de Masters), interrados in su campusantu locale. Sa punna de Masters est de contare sa realidade de una biddighedda rurale americana, a foras de is fàulas chi is bivos contant a pitzus de sa vida issoro[1].
Sa prima editzione de sa regorta publicada in s'abrile de su 1915 contaiat 213 rètulos, essidos posca 243 prus The Hill (Su Montigru) in sa versione definitiva de su 1916. Sa regorta cumprendet deghennoe istòrias chi interessaiant unu totale de 248 personàgios chi cugùgiant agiumai totu is categorias e is mestieris umanos. Masters si proponiat de descrìere sa via umana contende is fatos de unu micro-cosmu, sa biddighedda de Spoon River. In apenditze a sa versione in limba originale b'est unu poemeddu èpicu-satìricu intituladu "The Spooniad"[2] in ue unu de is personàgios de su libru (Mr. Jonathan Swift Somers) cheret contare totu is fatos acontèssidos in Spoon River ma non resesset lassende·ddu sena agabbu.
Masters s'est ispiradu a persones esìstidas de a beru in is biddas de Lewistown e Petersburg, acanta de Springfield in Illinois, in ue issu fiat pesadu. Su piessìnniu prus de importu de is personàgios de Edgar Lee Masters est chi, essende mortos, non teniant prus nudda de pèrdere e tando podiant nàrrere cale si siat cosa a pitzus de sa vida issoro in sintzeridade totale. Segundu istudiosos medas, s'autore s'est ispiradu, nessi pro s'istrutura de s'òpera, a s'Antologia Palatina[1].
Resèssida e crìtica
[modìfica | modìfica su còdighe de orìgine]Spoon River Anthology at retzidu crìticas positivas e est istadu acòllidu bene dae su pùblicu. Autores che Ezra Pound e Carl Sandburg dd'ant bantada in is retzensiduras issoro.[3][4]
Persones medas ancora bias e a discansu connoschìbiles in is "rètulos" de s'òpera si nde sunt annugiados bidende is fainas issoro prus segretas e privadas publicadas in cussas poesias. Su libru fiat proibidu in is iscolas e librerias de Lewistown fintzas a su 1974.[5]
Master at iscritu una sighidura de s'òpera, The New Spoon River, in ue is Spoon River est essida unu burgu de Chicago e is bividores suos si sunt urbanizados[6]. S'òpera no at segudadu sa resèssida e is bantos de Spoon River Anthology.[7]
In Itàlia, sa prima editzione est istada publicada in su 9 martzu 1943 dae sa domo editora Einaudi in s'ìnteri de su regìmene fascista, furriada in italianu dae Fernanda Pivano chi aiat lèghidu su libru originale sighende su consìgiu de Cesare Pavese e chi est istada posta in presone pro àere publicadu un'òpera chi contrariaiat is ideales fascistas.[8][9]
Sa bidda de Lewistown at tzelebradu a s'autore ponende un'istàtua in su campusantu Oak Hill Cemetery e oferende una caminera in mesu a is tumbas chi ant ispiradu s'òpera[10]. In su 2015 at festadu is 100 annos de sa publicatzione.[5]
Riferimentos
[modìfica | modìfica su còdighe de orìgine]- ↑ 1.0 1.1 (IT) Masters, Edgar Lee. e Mondadori, Cles, tipografo trentino., Prefatzione, in Antologia di Spoon River, 10. rist, Mondadori, 2001, p. 10, ISBN 88-04-49609-6, OCLC 800981627.
- ↑ The Spooniad – American Poems – Analysis, Themes, Meaning and Literary Devices, in americanpoems.com. URL consultadu su 26 nadale 2020 (archiviadu dae s'url originale su 4 nadale 2020).
- ↑ (EN) Ezra Pound, Webster Ford (PDF), in The Egoist, pp. 11-12.
- ↑ (EN) Carl Sandburg, Notes For a Review of "The Spoon River Anthology", in The Little Review, [Huntington, W. Va. : John McKernan, 1969, pp. 42-43.
- ↑ 5.0 5.1 (EN) How the Once-Banned Spoon River Anthology Made a Comeback in Lewistown, in The National Endowment for the Humanities. URL consultadu su 26 nadale 2020.
- ↑ (EN) Edgar Lee Masters, The new Spoon River, New York, Macmillan, 1968. URL consultadu su 26 nadale 2020.
- ↑ (EN) Ronald Primeau, Beyond Spoon River: The Legacy of Edgar Lee Masters, University of Texas Press, 27 austu 2014, ISBN 978-1-4773-0177-7. URL consultadu su 26 nadale 2020.
- ↑ (IT) Masters, Edgar Lee. e Mondadori, Cles, tipografo trentino., Prefatzione, in Antologia di Spoon River, 10. rist, Mondadori, 2001, p. 13, ISBN 88-04-49609-6, OCLC 800981627. URL consultadu su 26 nadale 2020.
- ↑ (IT) La Storia siamo noi - Fabrizio De Andrè, in web.archive.org, 22 ghennàrgiu 2009. URL consultadu su 26 nadale 2020 (archiviadu dae s'url originale su 22 ghennàrgiu 2009).
- ↑ (EN) Oak Hill Cemetery, in lewistownillinois.org. URL consultadu su 26 nadale 2020.