Tràchia otzidentale

Artìculu in LSC

Posidura in Grèghia

Sa Tràtzia otzidentale o fintzas Tràtzia greca(grecu [Δυτική] Θράκη, [Dytikí] Thráki; turcu Batı Trakya; bùlgaru Западна Тракия, Zapadna Trakia) est una regione geogràfica de sa Grèghia norti-orientale, parte de sa regione istòrica de sa Tràtzia, atualmente ispartzida impare a Bulgaria e Turchia. Su cabulogu est Komotini.

Sa Tràtzia otzidentale est posta in su chirru prus norti-orientale de s'istadu, in ue faghet làcana in su norti cun Bulgaria, in s'estu cun Turchia e in su sud cun su mare Egeu. Tenet istèrrida de 8.578 km² e populatzione de unos 371.200 bividores.

Est una regione populada de una minoria cunsistente, unu 35 % de sos bividores, de religione islamica, de limba mama e cultura turca. Custos non godint de peruna genia de amparu de s'istadu grecu chi, de su 1983, annu de sa decraratzione de indipendèntzia de Cipru norti apogiada de sa Turchia, cunsiderat totu sos tzitadinos de religione islàmica grecos musulmanos, chentza àteras isceras chi nde reconnoschent diferèntzias culturales e linguìsticas.

Est sa regione prus pobera e incuida de sa Grèghia.