Assotziu Su Majolu

Articulu in logudoresu

Su Majolu est unu assotziu apartìticu de istudiantes sardos naschidu in s'universidade de Tàtari in su mese de martzu de su 2011, chi punnat a s'amparu de su sardu in tottus sos libellos de imparu, dae s'iscola primaria a s'universidade, a manera de lu salvare e nde lu giugher a su matessi gradu de impreu de s'italianu ind una situatzione de plurilinguismu perfettu.

Difattis, su sardu est in su paradossu chi est non solu sigundu a sa scientzia limbistica, ma finas po leze (de jure) comente a s'italianu, ma de facto est in foras de belle tottus sos campos sotziales e abbarrat ind un'isfera minoredda privada: custa puru si ch'est isperdende sempre de pius po more de su fattu chi s'italianitzatzione, in passadu, at pesadu in iscola unu muntone de zovanos sardos faghendelis fortzare a grisare sa limba e cultura issoro, e como non bi at ancora mediu publicu perunu po chi podat imparare e impittare sa limba sa generatzione noa, chi in sa pius parte est monolingue in italianu.

S'assotziu, po sensibilizare a sa zente, at presentadu tres motziones e petitziones: In su 2012 at collidu pius de 1000 firmas, cando at dimandadu a sos universitarios de s'universidade tataresa si fin de acordu a istituire duos cursos de làurea pro formare professores e mastros de limba sarda. Sempre in su matessi annu, sos attivistas an iscrittu a su guvernu italianu e a su parlamentu europeu po sa chistione de sa ratìfica italiana de sa "carta europea de sas limbas regionales o de minorìa", cosa chi s'istadu italianu no at mai fattu a dannu de tottus sas limbas chi, a differentzia de su tedescu in Tirolu de josso, de s'islovenu in Friuli e de su frantzesu in Badde de Aosta, non tenen istadu a ue si zirare. In su mese de abrile de su 2013, s'assotziu at mandadu a innantis un'attera petitzione po pònner, in s'universidade, unu esamine de sardu in dontzi cursu de làurea de cada dipartimentu: an tando firmadu pius de 700 istudiantes iscrittos a s'ùrtimu annu de sas iscolas superiores de totu sa Sardigna.

Peri sa chistione ambientale est de importu po s'assotziu, dae su nono a su nucleare in su 2011 a su salvamentu de sos padentes in sos fogos de istiu.

Est finas faghende essire unu giornaleddu de nùmen Ischida, in ue si publican opiniones e bideas de zente chi bolet iscrier calchi cosa in limba.

A s'agabbu de su 2014, s'Assotziu Su Majolu at dadu amparu a una trumighedda chi aìat pedidu a Facebook una versione in sardu; sos de Facebook an dadu su permissu in su primu de abrile, dende cumintzu a su protzessu de bortadura.