Beersheba

Articulu in logudoresu

Beersheba

Beer Sheva (ch'in ebraigu sinnìfigat “Putzu Sete”) est una tzitade israeliana situada in su desertu de su Negev in su suddu de su paìsu. Narada fitianu “sa cabitale de su Negev", est sa de sete tzitades prus mannas de Israele, cun una pobuladura de 205.588 abitadores.

S'importu de Beer Sheva fiat crèschidu in su de 19 sègulos, addaghi sos turcos otomanos aiant fraigadu un'istassione rezionale de polima in ie. Sa batalla de Beer Sheva fiat istada parte de un'ofensiva ampra britànniga de sa segunda gherra mundiale, chi teniat s'intentu de truncare sa lìnia de defesa turca dae Gaza a Beer Sheva. In su 1947, Beer Sheva fiat istada cussiderada comente parte possìbile de un'Istadu àrabu in su Pranu de Partzidura de sas Nassiones Unidas pro sa Palestina. In fatu de sa decraradura de s'independèntzia de Israele, s'armada ezitiana aiat acumassadu sas fortzas suas in Beer Sheva comente base istratèziga e lozìstiga. In sa batalla de Beer Sheva, cumbatida in su santugaìne de 1948, sa tzitade fiat istada cunchistada dae sas Fortzas Israelianas de Defesa.

Beer Sheva at tentu una crèschida cussideràbile dae tando. Una parte manna de sa pobuladura est formada dae sos dessendentes de zudeos sefarditas e zudeos mediorientales chi fiant immigrados dae sos paìsos àrabos a pustis de su 1948, gasi etotu che comunidades prus minores de zudeos indianos. Sa de duas e sa de tres undadas de immigradura ant tentu logu dae su 1.990, batende zudeos aschenazitas dae sa Rùssia e àteros paìsos de s'Unione Soviètiga antiga, gasi che disterrados zudeos dae s'Etiòpia. Sos immigrados russos e de àteros paisos de s'ex URSS ant rènnidu su zogu de sos iscacos un'atividade de primu sinnìfigu in Beer Sheva. Sa tzitade rapresentat como su tzentru israelianu de sos iscacos, cun una prochentale de iscachistas de livellu artu prus manna ch'in cale si siat àtera tzitade de su mundu.