Castanza

Dae Wikipedia, s'entziclopedia lìbera.


Articulu in nugoresu

Arbure de sa Castanza

Sa castanza est mata de monte pacu artu, inube proghet ma non b'at frittu meda. Tenet bisonzu de terra nighedda, lèpia e profunda, ricca de potassiu e fosforu. Bi nd'at pacas in su Guilcieri, ma medas in Barigadu e in sos montes a curtzu. Est una mata maestosa e sèneche, podet vivere fintzas a chimbichentos annos e passa, paret chi si nd'atzapen millenarias. S'artesa media est de binti metros, ma capitat de arribare a sos trinta-trintachimbe, e su diametru de su truncu a battor metros e prus. S'iscorza est sinnada dae artu in bassu dae cordones; sas fozas, longas e ovales, che rùchen in attonzu, a pustis de cocher su fruttu, torran a bocare dae aprile a maju; sos frores isparghen dae s'acabbu de làmpadas a sa metade de trìbulas. Su fruttu est in intro de s'eritzu ispinosu, a primu birde, posca grogatzu. Che lu recollin in sos meses de Capidanne e de Santandrìa.