Margherita Hack

Dae Wikipedia, s'entziclopedia lìbera.
Jump to navigation Jump to search

Provintzia de Casteddu-Istemma.png
Articulu in campidanesu
Provintzia de Casteddu-Istemma.png

Margherita Hack (Firenze, 12 lampadas 1922Trieste, 28 de làmpadas 2013) est istada una astrònoma italiana.

Margherita Hack in su 2007

Biografìa[modìfica | modìfica su còdighe de orìgine]

Su babbu de Margherita, Roberto Hack, fiat unu contàbbili de Firentze de arraxinas svìtzeras e religioni protestanti. Sa mamma, Maria Luisa Poggesi, toscana, fiat de religioni catòlica, diplomada a s'Acadèmia de is artis bellas e miniadurera in sa Galleria degli Uffizi. Totus e duus is genidoris iant lassau sa religioni insoru po pigai parti a sa Società Teosofica Italiana, de sa cali Roberto Hack est stètiu segretàriu asuta a sa presidèntzia de sa contissa Gamberini-Cavallini.[1]

Margherita Hack, a pustis de ai agabbau is stùdius (chena susteni is esaminis de maturidadi po mori de su scòpiu de sa Segunda gherra mundiali) in su Liceo Classico "Galileo" de Firentze, s'est laureada in Fìsica in su 1945 cun una tesi de astrofìsica a pitzus de is Cefeidis.

A giòvuna, at praticau basket e atlètica lèbia. Est stètia campioni de brincu in artu e longu in campionaus universitàrius (ca asuta a su fascismu ddi narànt "Littoriali")[2][3][4]. Arregodendi s'adolescièntzia sua, at nau: "Fiaus totus natzionalistas, andaiaus a is atòbius, fadiaus sport, si spassiaiaus meda. Seu stètia fascista fintzas a su 1938, candu ant fatu efetu is leis ratzialis"[5]. Su 19 de friaxu 1944, mancai a mala gana po s'ateismu suu, at coiau cun tzerimònia religiosa in sa crèsia de San Leonardo in Arcetri a Aldo de Rosa[6], pobiddu suu fintzas a sa morti.

Est morta su 29 de làmpadas 2013 a is 4:30 de mangianu in su spidali de Cattinara de Trieste, innui fiat arricoverada de una cida po problemas de coru[7]. Est interrada in su campusantu de Sant'Anna de Trieste.

Atividadi scientìfica[modìfica | modìfica su còdighe de orìgine]

Est stetia professora ordinària de astronomia in s'universidadi de Trieste de su 1964 a su 1 de donniasantu 1992, candu dd'ant posta "a foras de rolu" po becesa[7]. Est stètia sa prima fèmia a dirigi s'Osservatòriu Astronòmicu de Trieste de su 1964 a su 1987[8], bitendiddu a nomenada internatzionali[9].

Membru de is sociedadis fìsicas e astronòmicas prus de prestìgiu, Margherita Hack est stètia puru diretora de su Dipartimentu de Astronomia de s'Universidadi de Trieste de su 1985 a su 1991 e de su 1994 a su 1997. Est stètia membru de s'Accademia Nazionale dei Lincei. At traballau in medas osservatòrius americanus e at fau a manera ca sa comunidadi astronòmica italiana podiat ammanniai s'atividadi sua in s'impreu de medas satellitis, arribbendi a una bona nomenada internatzionali[9].

At pubblicau su traballu suu in rivistas internatzionalis e medas libbrus, siat de spainadura scientìfica, siat a livellu universitàriu. In su 1978 at fundau sa rivista bi-mestrali "L'astronomia", cun su primu nùmeru bessiu in donniasantu 1979. A pustis, in pari cun Corrado Lamberti, at dirìgiu sa rivista de spainadura scientìfica e cultura astronòmica "Le Stelle"[10]. In su 1994 at arriciu sa Targa Giuseppe Piazzi po sa circa scientìfica. In su 1995 at arriciu su Premiu Internatzionali Cortina Ulisse po sa spainadura scientìfica.

Fiat segura de s'esistèntzia de atras formas de vida in sa galàssia, ma ca no ddas iaus a podi mai cuntatai po problemas de stesiada. At crètiu pagu a is UFO, narendiddus "bischerate" (tontidadis)[11].

Atividadi sotziali e polìtica[modìfica | modìfica su còdighe de orìgine]

Margherita Hack fiat connota puru po is atividadis a foras de s'àmbitu scientìficu, cummenti su polìticu e sotziali. Fiat àtea e pentzàt ca s'ètica no beniat de sa religioni ma de "printzìpius de cuscièntzia" ca permitint a totus de teni una bisura lega de sa vida, arrespetosa de su pròssimu, s'individualidadi e sa libbertadi suas.[12] Cuntrària a dònnia forma de superstitzioni, inclùdias is pseudo-scièntzias, de su 1989 fiat garanti de su cumitau scientìficu de su CICAP e presidenti onorària e de s'UAAR.[13] S'est iscrita in su 2005 a s'Assòtziu Luca Coscioni po sa libbertadi de circa scientìfica. Fiat iscrita a su Partidu Radicali Trans-natzionali.[14]

In su 2005 s'est candidada cun su Partidu de is comunistas italianus pighendi 5.634 votus in sa tzitadi de Milanu[15]. A pustis, at giau su scannu suu a Bebo Storti. S'est candidata un'atra borta in su 2006 cun su pròpriu partidu, ma at torrau a lassai s'intregu po sighi su traballu suu in s'astronomia. Su 20 de martzu de su 2009 s'est candidada cun sa Lista Anticapitalista po is eletzionis europeas chena passai su 4% de is scioberus ca serbiant po intrai in su parlamentu[16][17]. In donniasantu de su pròpriu annu, at criticau a su Presidenti de su Cuntzillu Silvio Berlusconi cun una lìtera aberta a sa rivista MicroMega in contu de is protzeduras giuditziosas suas e de is tentas suas po ddus straviai[18]..

Me is eletzionis arregionalis de su 2010 est stètia elìgia in Lazio cun 7000 votus po sa Federazione della Sinistra, ma in su primu atòbiu at lassau su scannu a atrus candidaus[19]. In su 2011 at pigau sa tèssera de su partidu Democrazia Atea[20], ca dd'at candidada po is eletzionis natzionalis de su 2013[21]. In su 2012 at decrarau de acotzai a Nichi Vendola po is eletzionis primàrias de su centru-manca[22] e a Matteo Renzi po su ballotàgiu contra a Pierluigi Bersani[23]. In s'abrili de su 2013 est intrada in su cumitau "Emma Bonino Presidente" in pari cun atras personas nomenadas cummenti Renzo Arbore, Toni Garrani, Anna Fendi, Alessandro Pace e Stefano Disegni.

Po sa circa a pitzus de s'energia nucleari[modìfica | modìfica su còdighe de orìgine]

Margherita Hack fiar contrària a sa costrutzioni de centralis nuclearis in Itàlia, perou fiat favoràbili a sa circa in su pròpriu tema, acrarendi ca s'Itàlia fiat unu paisu pagu afidàbili[24]. Issa naràt ca ddoi fiat una "timòria irratzionali, scientìfica e totu, de s'energia nucleari", ca perou "iat alluai mancu che s'energia a petròliu, a metanu e a craboni, ca eus a depi impreai cumentisisiat". At perou arregodau sa necessidadi de s'ammanniadura de s'energia arrenoabili.[25]

Po is deretus civilis[modìfica | modìfica su còdighe de orìgine]

In su 12 de austu de su 2010 Margherita Hack est stètia premiada cummenti "personàgiu gay de s'annu" po s'atividadi sua a amparu de is deretus civilis e de su conoscimentu giurìdicu de is copias omosessualis[26]. At puru amparau su deretu a s'eutanasia.[27]

Po is deretus de is animabis[modìfica | modìfica su còdighe de orìgine]

Est stètia animabista e vegetariana giai a pipia. At decrarau ca no ia mai papai petza "poita mi parrit orrorosu deabberus a bocì millionis e millionis de animabis.. est deabberus unu degògliu ònnia dì in sa terra"[28].

Po s'italianu in s'universidadi[modìfica | modìfica su còdighe de orìgine]

In s'urtima intervista sua a Giorgio Pagano de s'Associazione Radicale Esperanto s'8 de làmpadas de su 2013 at decrarau sa contrariedadi sua a s'impreu esclusivu e obbligatòriu de s'ingresu me is universidadis italianas.

Notas[modìfica | modìfica su còdighe de orìgine]

  1. Teosofia in Italia
  2. www.vegfacile.info/vegan-famosi.html
  3. L'astrofisica Hack, stella dei "Littoriali" del fascismo
  4. Corriere della Sera, «Giurai al regime, volevo la medaglia vinta in atletica» Margherita Hack
  5. Biografia di Margherita Hack
  6. Intervista a Margherita Hack sul matrimonio con Aldo De Rosa
  7. 7.0 7.1 È morta l'astrofisica Margherita Hack
  8. Grandi maestre/Grandi allieve - Margherita Hack e Chiara Daraio
  9. 9.0 9.1 Hack, Margherita
  10. Pagina Storica de "Le Stelle" Archiviadu su 28 cabudanni 2008 in s'Internet Archive.
  11. Libro testamento di Margherita Hack: "Alieni esistono ma gli ufo sono bischerate"
  12. Ingerenza del Vaticano di Margherita Hack Archiviadu su 5 martzu 2016 in s'Internet Archive.
  13. I Presidenti onorari dell'UAAR
  14. Pagina di Margherita Hack sul sito web del Partito Radicale Transnazionale (RadicalParty.org) Archiviadu su 30 santandria 2012 in s'Internet Archive.
  15. Risultati elettorali a Milano Archiviadu su 26 nadale 2007 in s'Internet Archive.
  16. I candidati alle europee del 2009 della Lista anticapitalista Rifondazione-Comunisti Italiani Archiviadu su 19 nadale 2009 in s'Internet Archive.
  17. Il Tempo - Europee: Hack candidata con lista PRC-PdCI Archiviadu su 22 martzu 2009 in s'Internet Archive.
  18. Lettera di Hack su Micromega contro Berlusconi
  19. Giassu Web de sa regioni Lazio
  20. Alessandro Giacomini e Margherita Hack in Democrazia Atea
  21. La Stampa, 22/01/2013
  22. Un paese in via di sottosviluppo. Ma i giovani lo cambieranno
  23. Tentiamo il nuovo, è Renzi
  24. Intervista a Margherita Hack
  25. Margherita Hack: da ambientalista dico sì al nucleare.
  26. Margherita Hack personaggio gay del 2010 - Gay .it
  27. Intervista a Margherita Hack
  28. Vegetarianesimo e diritti degli animali con Margherita Hack