Pedru Paulu Birdis

Dae Wikipedia, s'entziclopedia lìbera.
Jump to navigation Jump to search
Pietro Paolo Virdis, 1988.jpg

Antoni Pedru Paulu Birdis (Tàtari, 26 làmpadas 1957) est unu fubaleri antigu sardu, atacadore de rolu.

Carriera[modìfica | modìfica su còdighe de orìgine]

A pustis de zogare cun sa Juvenilia, s’istrenat in sa Sèrie D cun sa Nugoresa in su 1.973-1.974. A sos 16 annos marcat 11 golos. A pustis, est tramudadu a su Casteddu, in ue tenet s’istrenu suo in sa Sèrie A su 6 de santugaìne de 1.974 contra a su Lanerossi Bissèntzia a sos 17 annos. S’annu in fatu disputa 23 partidas marchende 6 golos, nostamis de sa falada de partzidura adelantada largamente de sos rujubiaìtos, mescamente pro neghe de sa lesiada grae suferta dae su zogadore prus rapresentativu de sos sardos, est a narrer Gigi Riva. In custu tempus, cumponet in Casteddu cun Luisi Piras una croba de atacu interamente sarda, cun probabilidade intre sas prus fortes in s’istòria de su fùbalu isulanu.

Su primu annu in sa de duas partziduras custituit su de sa cunsagradura pro s’atacadore sardu bintarzu, chi realizat sa fiolera de 18 golos, unu resurtadu chi l’intrat a s’ameriadorzu de sa Juventus, in ue dìsputat tres campionados in sos cales no agatat semper meda tretu. In su 1980, torrat a Sardinna pro un’annu, posca faghet sa recuida sua a sos colores arbunieddos in 1981. A pustis de un’istajone òtima cun sa formadura peemontesa, in su 1982 est tramudadu s’Udinesa pro dassare su logu suo a Paolo Rossi, chi at cumpridu su tempus suo de iscalifigadura e at triunfadu in su mundiale de su 1982. In Ùdine, Birdis zogat pagu in sa prima istajone pro neghe de lesiadas infadosas, cando ch’in sa de duas realizat 10 golos.

In su 1984, lu cuntratat su Milan, in ue abarrat finas a su 1989, afirmende-se comente unu de sos atacadores italianos prus fortes. Sa mezus istajone sua est sa 1986-1987, in ue est marcadore màssimu de sa Sèrie A cun 17 golos; in s’istajone posteriora, sos golos suos ant a permiter a su Milan de recuperare una distàntzia cussideràbile dae su Nàpule, superadu finas gràssias a unu duprete detzisivu in Nàpule-Milan 2-3 de s’1 maju 1988, partida fundamentale pro su logru de s’iscudete dae bandas de sos rujunieddos. S’annu in fatu otenet finas sa Cupa de sos Campiones in Bartzellona, in ue, in sa finale contra a su Steaua Bucarestu de su 24 maju 1989, intrat in parte a Ruud Gullit in su de 15’ de su segundu tempus.

Fiat istadu unu penaltista primorosu: in su campionadu, aiat disintzertadu una ùniga penalidade manna, arressada dae Zuanne Paulu Grudina, zanneri de su Pisa, isse puru sardu.

S’est retiradu dae su fùbalu in su 1991, a pustis de disputare sas ùrtimas duas annadas comente profissionale cun su Letze.

In tempus de sa carrera sua, no at zogadu mai in sa prima internassionale, peroe contat cun 8 presèntzias e unu golu in s’internassionale olìmpiga, in sa cale aiat disputadu sos zogos de Seulu.

Cun posterioridade, at traballadu de cumentadore telebisencu e reghet una butega de màndigos e binos fontomados in Milanu.