Portu Conte

Dae Wikipedia, s'entziclopedia lìbera.
Jump to navigation Jump to search

Ozieri-Stemma.png
Articulu in logudoresu
Ozieri-Stemma.png

Bisùra de Portu Conte dae Capu Catza.

Portu Conte (in italianu Porto Conte, in cadelànu Port del Comte) est su golfu prus mannu de sa Costèra de su Coràddu, postu in s'ala nord-otzidentale de sa Sardigna e in intro de sa tzittade de s'Alighera, a una distantzia de unos 20 kilometros. Su golfu lu inserran sos promontorios de Capu Catza e Punta Lizu. Dae s'intrada a s'aggabbu b'at unos 6 kilometros. Tottu sa costèra la faghen caleddas minores, roccas e un'ispiàggia manna connòtta cun su nùmene de Mugoni, chi serrat su golfu.

Connòttu a su tempus de sos romanos antigos comente Portus Nimpharum (su portu de sas ninfas), su golfu est unu de sos portos naturales prus mannos chi si agàtten pèri tottu su Mare de Mesu. Pro custu fattu, est sèmper istàdu de impòrtu istratègicu mannu in sos segulos colàdos. Como carchi annu su logu est suzetu a amparu, faghende parte de su Parcu Regionale de Portu Conte in su trettu terrestre, e in cussu marinu de s'Area Naturale Protetta de Capu Catza - Isula Piana.

Su logu istrategicu at fattu a manera chi su golfu fit cuadorzu de barcas chi appartenìan a piscadores e nàes de mercadùra e de gherra. In su fondale an agattàdu medas imbarcatziones latinas. In su 27 de aùstu de su 1353, Portu Conte at bìdu una battalla in ue s'armada cadelàna e venetziana, chi nde fit a cabu Bernardu de Cabrera, binchìat cussa genovesa, fattu istoricu chi at pòstu s'Alighera e sa Sardigna in sùtta de sa Corona de Aragòna.

In su cursu de sas gherras napoleònicas, sa flotta britannica chi ghiaìat s'almirante Oratziu Nelson bi aìat una base sua in sa costèra nord-otzidentale de sa Sardigna. Sa presentzia inglèsa ponìat cuntrollu a sas intràdas e bessìdas de s'armada frantzèsa, chi tenìat - e galu tenet - sa base sua in su portu de Tolone. Su golfu de Portu Conte fit unu ispàtziu seguru in ue istàre pro sas nàes britannicas, chi fin alliàdas cun cussas sardu-piemontèsas pro impidìre un'isbàrcu frantzesu in s'isula de Sardigna.