Project Zero
Articulu in logudoresu
Project Zero, in Giappone Zero (零〜zero〜) e in sos Istados Unidos Fatal Frame, est unu videojocu de abbentura survival horror de su 2001, essidu a primu pro PlayStation 2 e a pustis, cund un'attera versione mezorada, pro Xbox. Lu at pubricadu Tecmo e, in Europa, Wanadoo. Est su primu capitulu de una seria chi at a facher sutzessu meda tra sos amantiosos de su genere.
Istoria
[modìfica | modìfica su còdighe de orìgine]Miku, sa pitzinna debile protagonista de su jocu, at a chircare a frade suo, Mafuyu, ind una domo ispèrdia de su Giappone; in s'impestantu, at a ischire su chi est sutzediu in ie, e la at a persichire chene piedade unu onryō malu meda.
Jocabilidade
[modìfica | modìfica su còdighe de orìgine]Sa protagonista chi movet su jocadore non tenet peruna manera pro si poder defensare, si nono fughindesìche o fachende fotografias cund una macchinedda particulare, sa Camera Obscura, chi podet cassare a sos pantasimas pro nche los bocare. Custa cosa est una caratteristica fentomada meda de sa seria intrega, chi difattis at a mantènner fintzas a pustis cun sos atteros capitulos: a su solitu, sos atteros videojocos pedin a tì nche fughire de su tottu, o a los bochire cun pistolas o atteras armas de focu; ma, sicomente si faveddat de presentzias chi su jocadore nemmancu podet tàngher o facher dannu, inoche est attera cosa.