Santu Sebustianu

Sebustianu, fintzas Serbestianu o Srebestianu (Sebastianus in latinu; Narbona, 256 - Roma, 20 de gennaxu 288) est stau unu soldau romanu, martirizau ca cristianu. Est venerau a santu de totu is Crésias chi amitint su cultu de is santus. Est afestau meda in Sardìnnia, e sa festa cosa sua, paris cun cudda de sant'Antoni abati, ponit su comentzu a su Carrasecare sardu.

Biografia

Fudi unu militare, uffitziale de sa guardia pretoriana de s'imperadore Diocletzianu, in Milanu. Denuntziadu comente cristianu benidi cundennadu a morrere colpadu dae fritzas.

Cultu

« Santu Serbestianu, màrtiri, chi, nadiu de Milanu, est bènniu a Roma, cumenti arrelatat sant’Ambrosu, in su tempus in chi assurvilànt persecutzionis ribbestas e aundi at sunfriu sa passioni; in Roma, duncas, aundi fiat lòmpiu cumenti forasteri stràngiu, at tentu su domicíliu de sa imortalidadi perpètua; sa depositzioni sua est accontèssia in Roma etotu ad Catacumbas in custa dì matessi. »

(Martyrologium romanum, 2004)

Sa Crésia catòlica ddu arregordat su 20 de gennaxu, mentras sa ortodossa su 18 de idas. In Sardìnnia est traditzioni de fai in sa dì de festa de santu Serbestianu (o de sant'Antoni abati puru) unu fogu mannu, tzerriau fogadoni o fogu fogoni, chi donat su comentzu a su tempus de Carrasegare.

Sa devotzioni a custu màrtiri s'est spainada in totu s'Itàlia, s'Africa romana, s'Ispagna, sa Germania e sa Gallia. In su seculu IV est stada fraigada sa basìlica de santu Sebustianu acanta a is catacumbas de sa Bia Appia in Roma. Custu santu est stau rappresentau meda de is artistas, spetzialmenti pintoris.

Patronaus

Santu Serbestianu est patronu minori de sa Diòcesi de S’Alighera-Bosa. Est puru patronu de Àrbus, Assou, Barùmini, Belchidda, Bultzi, Crùcuris, Miris, Gomajori, Gonnoscodina, Ùssana, Turri, Ollasta, Ollasta Useddus, Oniai, Pompu, Samugheo, Scalepranu, Sèneghe, Siris, Sorradile, Su Masu e Tertenia. Dus parròchias, in Casteddu e in Aristanis, funt dedicadas a issu.