Shenmue
Articulu in logudoresu
Shenmue (in giapponesu シェンムー 一章 横須賀 Shenmū Isshō: Yokosuka, a sa littera "Shenmue Capitulu 1: Yokosuka") est unu videojogu de atzione a mundu abertu, postu in isvilupu dae Sega AM2, produidu e dirigidu dae Yu Suzuki, e publicadu dae Sega pro sa console sua Dreamcast in su 1999. Suzuki at imbentadu unu genere a banda pro more de sa jogabilidade sua non lineàre, narendeli pro su jogu "FREE" (acronimu chi istat pro "Full Reactive Eyes Entertainment), fundadu a pizu de s'interattividade e libertade chi cherìat dare a su jogadore. Suzuki bolìat punnare a custu faghende una finghidura de sa bida, pro esempiu ponèndebi sas dies e s'ora cun tantu de cambios climaticos in tempus reale (cosa chi fit tando belle misconnoschida), addoppiamentu de tottu sa zente de tzittade cun sas cosas e traballos issoro, in prus de atteros elementos interattivos comente macchineddas, jogos arcade (cosa chi los faghìat unu jogu in intro de jogu) e tipicos convenience stores giapponesos.
Shenmue, in isse etottu, no imbentat nudda, ma dae sos elementos de gameplay chi pigat dae sos atteros generes nde faghet unu a banda, chi dìat diventare populare unu pagu prus a tardu in su 2001 cun sa seria de Grand Theft Auto III. Su jogu est fentomadu puru ca nde at fattu intrare in sos videojogos de oe unu elementu chi tando fit solu de Dragon's Lair , est a narrer su quick time event (buttone o prus de cracare a puntu debidu).
Shenmue fit tando su jogu chi at costadu de prus in s'industria; Yu Suzuki at nadu a primu chi sa produida benìat a costare $70 miliones (est a nàrrer, oe in die, $99 miliones), ma a pustis si at curregidu, narende $47 miliones (chi sun $67 miliones in su 2015). Su jogu tenet unu sighidore, Shenmue II, cund assumancu un'atteru pianificadu pro su Dreamcast; peròe, bidu chi at bendidu pagu meda a fronte de costos artos, sa seria est agabbada cun su segundu jogu, lassende s'istoria cun ispantu mannu.
Shenmue fit unu jogu meda istimadu a tempus sou e figurat meda in sas listas de "sos videojogos prus bellos de semper".