TV Tropes

Dae Wikipedia, s'entziclopedia lìbera.
Jump to navigation Jump to search

Ozieri-Stemma.png
Articulu in logudoresu
Ozieri-Stemma.png

TV Tropes and Idioms est unu zassu in linia, a tipu wiki, chi pigat in analisi tottus sos elementos chi torran semper in dontzi produtzione comente film, fumetos, videojogos, webcomics e atteros traballos de custa zenia. Su zassu si podet agattare in prus limbas e est pro unu publicu internatzionale, ma sa prus parte de sas paginas est in inglesu. Fundadu in su 2004 cun sa punna de trattare petzi de filmografia, su zassu est bennidu semper prus mannu e, como, tenet atteru puru.

Cuntennidu[modìfica | modìfica su còdighe de orìgine]

Su zassu est ammanizadu pro tenner paginas, chi sun dedicadas a sos elementos chi sun in intro de cada traballu creativu; si poden agattare, peròe, peri atteras cosas chi sun caratteristicas de su mundu fandom, comente sa tipica faeddada in suspu.

Sos articulos sun iscrittos ind unu limbazu chi non sonat formale meda, dende a s'ispissu immagines, aggantzos a YouTube e Wikipedia (nada the other Wiki, s'attera Wiki), slang e atteras ispressiones chi podimus atzappare in s'allega de cada die.

Pro dontzi elementu chi si pigat in cunsideru, bi at una lista de tottus sos traballos creativos chi bi lu an, cun calicuna nota in prus pro indittare in ue cambiat unu pagu.

Sas paginas si ponen in categorias, comente in Wikipedia, ma sas categorias in ie si naran "serias" e sun fattas a bella posta pro permitter una chirca orizontale pro mediu de buttones, chi serbin pro si mover a innantis e in segus tra sos artigulos de sa matessi seria. In prus, sas serias si poden ammanizare pro su tema trattadu: pro esempiu, si podet chircare pro unu tzertu mediu (liberos, fumetos, videojogos, e gai sighende), zenere (gherra, amore, risa, horror, etz.) o tipu de elementu figuradu (deus ex machina, istereotipos...).

Sa wiki no est formale pro nudda, non petzi pro comente si presentat ma fintzas pro comente funtzionat: si permittit, antzis est pretzisu a lu fagher, de iscrier artigulos a pizu de argumentos chi pagu si connoschen e chi in Wikipedia si dian cunsiderare comente pagu appropriados. Faghet puru a insertare cunsideros personales: difattis no est cosa rara a bi atzappare, ind unu puntu chi unu at iscrittu, un'atteru parrere chi ponet in duda s'argumentu de su primu in chistione. Un'attera cosa ca Tv Tropes si assimizat a unu forum, est sa presentzia de buttones pro cuare sos elementos de istoria (spoiler) a chie no nde cheret legher. Comente chi tottu custu non bastaret, bi at peri unu forum pro arresonare liberamente.

Su zassu non si basat a pizu de su software MediaWiki, a differentzia de atteros progetos comente Encyclopedia Dramatic o Uncyclopedia.