Tazenda

Dae Wikipedia, s'entziclopedia lìbera.


Articulu in logudoresu

Tazenda

Sos Tazenda cantande in Arbus (2014).
Informatziones
Orìgine Sardigna, Itàlia
Gènere musicale Pop rock, Mùsica ètnica, folk rock, pop
Annos de atividade 1988–in atividade
Etichetas Visa Record, Radiorama, Vida Records/Rusty Records
Giassu tazenda.it
Membros Gigi Camedda
Gino Marielli
Nicola Nite
Membros colados Andrea Parodi
Beppe Dettori

Sos Tazenda sun una banda musicale etno-pop rock sarda chi Andrea Parodi, Gigi Camedda e Gino Marielli, chi benìan dae su grupu Coro degli Angeli, aìan fundadu in su 1988. Est connotta pro su riferimentu suo a sa musica traditzionale de sa curtura isulana e, mescamente, a sa limba sarda. Su prus de sas cantones est, difattis, nessi in carchi lìnia in sardu logudoresu, impare a s'italianu (ma, a bìas, lis at capitadu de cantare peri in atteras limbas, comente s'ispagnolu e s'inglesu).

Su nùmen pro sa banda lu an picadu dae Secundu Fundamentu, unu romanzu de Isaac Asimov chi pertenet a su tziclu de su Fundamentu. In su romanzu jocat unu rolu mannu su praneta Tazenda (nomìnzu chi benit dae su faeddu inglesu Star's End ). Su isseperu, sicundu sa testimonia de sos Tazenda etottu, fit istadu pro custu nùmen gràtzias a un'assimizu de sonu cun su sardu.

Zenere musicale[modìfica | modìfica su còdighe de orìgine]

Su zenere de sos Tazenda lu an muttidu "etno-pop-rock"; sa caratteristica sua est, difattis, chi bi istat tra pop, rock e musica etnica, cund un'influentzia manna chi la jocat su sardu. A s'ispissu, in sas cantones bi at fintzas istrumentos musicales sardos, comente launeddas e organittos.

A libellu de boche, attera influentzia de sa musica sarda, bi at tres boches a tonu diferente: unu tenore, una contra (baritonu), e unu bassu chi a s'ispissu cantan fachende assimizos cun su cantu a tenore. Su bassu est Gigi Camedda, sa contra est Gino Martinelli e su tenore est istadu, a primu, Andrea Parodi e, a pustis, Beppe Dettori.

Sa limba prus impreada, fintzas a su 2013, fit sa sarda e, sicomente benin tottus dae su cabu de susu, cantan pro su prus in logudoresu. In sos primos album fit su sardu sa limba a dominare, ma cando an ottentu sutzessu peri dae foras in continente, sos Tazenda an cumintzadu a nche facher intrare s'italianu puru in sas cantones.

Custu est istadu cajone pro chi Andrea Parodi aìat lassadu su grupu in su 1997, sighinde a facher una carriera de solista prus aggantzada a sa musica traditzionale, pro more de su fattu chi sos Tazenda si fin ispinghende tropu a su zenere pop.

Est particulare s'album ¡¡¡Bum-ba!!!, in ue sos Tazenda an cantadu peri in ispagnolu. Dae s'album Ottantotto in susu, su grupu fit de su tottu una banda pop, cumintzande a impreare fintzas sintetitzadores e tasteras, ma sighinde semper a cantare in sardu e italianu, cund in prus un'azicu de inglesu.

Controllu de autoridadeVIAF (EN301858985 · ISNI (EN0000 0000 9184 8541 · GND (DE10343241-3 · MusicBrainz f30ad5cd-5993-4a84-a689-5961352043d5 · Su valore a0000002392701 de NLP no est vàlidu. · WorldCat Identities (EN301858985