Battalla de Seddori
Articulu in nugoresu
Sa battalla de Seddori est istada una pelea gherrada in su 30 de lampadas de su 1409 in su pranu a sud de su casteddu e de sa bidda seddoresa chi bidiat cuntrappostos sos sordàos arbaresos, chi los ghiabat Guglielmo III de Narbona, e sos cadalanos de Martinu I de Sitzilia, primu naschiu de Martinu I de Aragona.
S'ischiera sarda de Arbaree fit de 20.000 sordaos e contabat in supra sa làdina superioridade numerica, mentras s'esertzitu aragonesu fit a s'imbesse in inferioridade (petzi 11000 sordaos) ma contabat in supra una tattica chi meda at jocau pro sa binchida issoro.
Sos sardos fint essios dae su chi est oje connotu che "bruncu de sa battalla", ma sos aragonesos aiant fattu una manovra a cota, tale de partire in duos su fronte de s'esertzitu sardu ind un'ala de manca e ind una de dresta, e sa de manca in duos ateros cantos: sa prima si che fit ritirada a su casteddu de Seddori e che los aiant mortos a sa conchista sua, uchidende prus de 600 sordaos e fachende presoneras unas 300 feminas de su locu; sa secunda aiat chircau de si adobiare chin su restu de sas fortzas in Seddori colande pro su ribu Flùmini Mannu, ma sorte cheriat chi non lu podiant attraessare ca fit bocau, e custrintos a artziare a un'artura fint presos e iscannaos in su locu chi si connoschet che "Boccidroxiu". S'atera ala chi fit abbarrada, sa de dresta, aiat resessiu a si ritirare in su casteddu de Monreale.
Sa derrota manna pro sos sardos at fatu a manera chi sos aragoneos podiant falare a Bosa, picandela, chin s'intentu de facher gai etotu chin Aristanis, ma su judiche de factu Lenardu Cubello aiat firmau prima, fortzis in traitoria, sa resa. S'unicu rennu sardu indipendente de tando, cussu de Arbaree, perdiat s'indipendentzia e, sicomente si che fit mortu Martinu I de Sitzilia pro mal'aghera (nanchi prus debile a fortza de si "ispassiare" chin una presonera chi aiat picau, sa bella de Seddori), fintzas sa corona aragonesa at connotu su declinu.