Caminu de ferru Mandas-Arbatassa
logudoresa. Abbàida sas àteras bariedades gràficas:
campidanesu · LSC · nugoresu
Su caminu de ferru Mandas-Arbatassa est una lìnia ferruviària turìstiga de ladària manna zestionada dae s'IRST in su cuadru de su servìtziu Trenigheddu Birde. Atuarmente, est su caminu de ferru turìstigu prus longu de Itàlia, gasi che sa lìnia de ladària minimada prus longa de Europa.
Cursàriu[modìfica | modìfica su còdighe de orìgine]
Sa conca de lìnia de sos trenos est Mandas, dae ue moent normarmente sas cumponiduras de sas lìnias de su Trenigheddu Birde de su cumpartzimentu de Casteddu. Pagu ora a pustis de sa moida, si nche crompit a su puntu in ue sa lìnia dassat sa de Ìsili e Sòrgonu e si sòdigat chirru a s'estu, sizende sas leadas de Arrolli, Nurri e Biddanoa Tulu. Dae ie cumintzat un'artiada costante chirru a sos montes de s'Ozastra, gasi a pustis de zumbare su lagu bassu de su Frumendosa si nche crompit a sa cantonera de Palarana, posta intre duos tùnneles e, in su tempus coladu, logu de traballu a ue fiant destinados sos cantoneris indissiplinados. Sa trassadura cumintzat a si fagher garronosa a medida chi aumentat s'artària, e su trenu, a pustis de colare s'arressada de Bertiddi, nche sizit in s'òrdine Estèrzili, s'istassione de Sàdali-Seulu e sa de Seui, puntu de rugramentu avesale de sos trenos.
Si biazat a inghìriu de 800 metros de artària, no a largu dae su Serrarghentu, e aumentat sa presèntzia de pontes, tùnneles e bortas, e a pustis de sas arressadas remengas de Anulù, Santu Giròmini e Niala, si sizint sas biddas de Ussassài e Gairu, chi s'istassione s'agatat in sa leada de Gairu Tachisara, tèrminus antigu de s'arrampamentu disimpreadu de Jertzu. A pustis de rugrare unos cantos tùnneles e afrinare sos oros de su lagu artu de su Frumendosa, si nche sizint sas istassiones de Biddamanna Strisàili e Àrzana, ambas a tesu meda dae sas leadas respetivas.
Dae Àrzana in antis, cumintzat sa falada longa chirru a su mare e, a pustis de furriare de 360° in su tunnel eligoidale de Pitzu de Cucu, si nche crompit a Lanusè, cabitale de sa provìntzia de s'Ozastra, a su cale sighint s'istassione de Èlini-Irbonu e s'arressada de Sedda Eleci. Finarmente, si crompit a su paris, in su territòriu de s'àtera cabitale de sa provìntzia ollastresa, Tortuelie, penùrtima istassione in antis de sa conca de lìnia in su portu de su trighinzu de Arbatassa.