Intzidente ferruviàriu de Castelldefels

S'intzidente ferruviàriu de Playa de Castelldefels de 2010 fiat acontèssidu in s'istassione de Castelldefels Playa, in sa logalidade ispannola de Casteldefels (Bartzellona) su 23 de làmpadas de 2010. In s'intzidente fiant obitadas 12 pessones.

Isvilupu de sos fatos

A sas ùndighi e degheotu de sero de sa die de s'intzidente, unu trenu de probianias aproghilende dae Bartzellona, chi fiat moidu a sas 11:06 cun destinu a Sitges, faghet arressada in Castelldefels Playa. Dae su trenu, unu Sèrie 451 de Renfe de formadura dupra, cun capatzitade de 1816 pessones, nche fiat faladu unu nùmeru de pessones meda superiore a s'avesale, pro more de su fatu ch'in sa praja probiana aiant programmadu diferentes eventos pro sa tzelebradura de sa note de Santu Zuanne. In s'istassione s'agataiant azentes bariados de polima de cara a s'aturmadura de zente.

A pustis de achirrare dae su trenu, sos biazadores deviant colare a s'àtera ala de sas bias pro nch'essire dae s'istassione. Pro custu, s'istrutura disponiat de unu sutacoladorzu de fraigamentu reghente e de una pontiga superiore. Sa pontiga fiat cunzada pro traballos, su chi fiat inditadu petzi dae una cadena, duncas unos cantos biazadores arribados aiant proadu a essire peri cussa pontiga pro dever a pustis torrare a s'apeadorzu. In unu printzìpiu, si fiat cussiderada sa possibilidade de un'istrampada de su sutacoladorzu, mancari sos azentes chi dispensaiant servìtziu in s'istassione decrarent chi sa zente nch'essiat cun normalidade. Argunos testimonzos aiant decraradu chi non fiant istados capatzos de bider chi esistiat unu sutacoladorzu.

A pustis de sa moida de su sutaurbanu, unu grupu de unas 30 pessones detzidit de rugrare sas bias.

A sas oras 11:23, fiat prebidu su trànsitu sena arressada peri s'àtera bia de unu trenu Sèrie 490 de Renfe, in servìtziu Alaris intre Alicante e Bartzellona, chi tzirculaba a ora a 139 km/h in un'arrogu in ue sa belotzitade màssima autorizada est de 150 km/h. S'Alaris aiat agrugadu a 150 metros de s'istassione su probianias chi protzediat in sa deretura contrària, pro custa resone nch'aiat faladu s'intensividade de sos faros pro no illuinare s'àteru machinista, comente apostìvigat su regulamentu. In s'arribonzu a s'istassione, s'abizat de su grupu de pessones chi sunt rugrende sa bia, duncas ativat sa bussina e su frenu de azutòriu. Su trenu istrampat su grupu 4 segundos a pustis, e s'arressat 800 metros a pustis de ativare su frenu.

Incherta

Su fatu fiat istadu sutapostu a duas inchertas: una tènniga, dae bandas de sa Cummissione de Incherta de Intzidente Ferruviàrios, e s'àtera zudissiària, dae bandas de su Tribunale 1 de Gavá.

S'imbestigadura de sa Cummissione fiat terminada su 31 de ghennarzu de 2011, crompende a su cuncruimentu chi totu sos sistemas aiant funtzionadu in manera adeguada e chi sos machinistas aiant assionadu curretamente e cunforme a su regulamentu. Sa seguràntzia de s'istassione fiat istada cumparada cun sas normas de àteros paìsos de s'Unione Europea, isprendende chi fiat normale dessintotu e non teniat bisonzu de modifigaduras. Non fiat istada realizada peruna casta de recumendadura.

S'imbestigadura zudissiària fiat terminada in sa prima istàntzia cun s'archivadura de su pretu su 30 de triulas de 2010, iscumbatende chi s'intzidente fiat istadu dèvidu a unu cumportamentu “incautelosu e malatrividu” dae bandas de sas bìtimas e chi s'istassione e sos servìtzios suos cumpriant cun sa regulativa e sas cundissiones de seguràntzia. Pro su chi pertocat su machinista, aiat dadu negativu in sa proa de arculemia e cunsumidura de trassicadores e sa reassione sua fiat istada lestra e curreta.

"Sas imbestigaduras zughent a s'ùnigu cuncruimentu chi sos òbitos siant dèvidos a unu cumportamentu incautelosu e malatrividu de sas bìtimas etotu”.

Sos familiales aiant recurtu a su Tribunale Provintziale, chi lis aiat dadu sa resone in parte, cussiderende chi fiat istadu bioladu su deretu issoro a un'amparu efetivu, e aiat cumandadu sa reabertura de su casu. Su zuighe s'est negadu a imputare su machinista de su trenu.

Bìtimas

Sas bìtimas mortales de su disacatu fiant istadas treighi pessones, chi duas teniant edades cumpresas intre 16 e 28 annos (sete de nassionalidade ecuadoriana, duos culombianos, duos bolivianos e una rumena) e una fèmina de 46 annos. Àteras batòrdighi pessones fiant resurtadas fertas (otu òmines e ses fèminas), una de issas in istadu crìtigu.