Nora

Articulu in logudoresu

Nora

Cabu Pula

Nora est una bidda antiga de fundadura nuràghica e posteriormente pùniga, cabitale de su pòbulu de sos Noresos. Est posta in su promontòriu de Cabu Pula, in sa costera meriesa de sa Sardinna, a s’uestu de Casteddu, atuarmente in sa comuna de Pula.

Pausania atribuit sa fundadura sua a Noratze s’eroe epònimu, chi ghiaiat sos Ìberos. Solinu su prus tardiu atribuit a Noratze un’aproghilamentu dae sa bidda mitiga de Tartessu.

Su nùmene derivat dae Noratze, comente cunfirmadu finas dae Solinu etotu: “A Norace Norae oppido nomen datum” (dae Noratze fiat istadu dadu a sa bidda su nùmene de Nora).

Sunt istadas imbènnidas istigas de sa presèntzia nuràghica, chi atestant una frechentadura de su situ in s’edade de su brunzu (in particulare in unu putzu nuràghicu inche sos “Banzos de Mare” e in sos maniestos de importadura de su mitzènigu III b, datàbile a s’edade nuràghica prena). In su territòriu inghiriadore, sunt atestados unos cantos nuraghes (Nuraghe “Sa Bàrdia Mongiasa” in s’ùniga artària modesta de s’internu terrenu immediatu; Nurage “Antigori” de Sarrocu, prus a tesu, in ue sunt istadas imbènnnidas tzeràmigas mitzènigas).

Istigas de sa repobuladura nuràghica-fenissa si referint a su de VIII sègulos in antis de s’era nostra (Istele de Nora, cun iscritura in un’arfabetu assimizadore a su fenissu, cun s’atestadura prus antiga de su nùmene de sa Sardinna), cando chi sos abarros prus antigos imbènnidos si referint a una necròpolis cun tumbas datàbiles intre s’agabu de su VII e su cumintzu de su de VI sègulos in antis de s’era nostra.