Tottoi (anime)
Articulu in nugoresu
Tottoi est un'anime de su 1992 chi at fattu sa Nippon Animation, cun Norifumi Kiozumi sèndebi a capu, e chi sa NHK at trasmittiu. Su cartone giapponesu picat s'istoria dae su contu de s'iscritore italianu pro piseddos Gianni Padoan.
Istoria[modìfica | modìfica su còdighe de orìgine]
Tottoi est unu pitzinnu, commomai mannittu, de 14 annos, fizu de unu sardu disterrau in Germania. Cando sìche morit mama sua, su babbu isseperat de cottiare a torrare a patria sua, sa Sardigna, in sa bidda ozzastrina de Durgali pro bi crescher e pascher menzus sos fizos. Tando fachen una bida nova in Cala Gonone. Accadit chi Tottoi, nadande in sas Grutas de su Boe Marinu, tenet ocasione de bier s'animale etottu, goi raru a atzappare chi si crediat iscumpartu dae belle deche annos. Su boe in chistione est una mama puru a puntu de fizare: su naschiu benit a secundu protagonista de s'anime. Su pitzinnu, grassias a s'azudu de unu naturalista chi lu accumpanzat, at a facher amistade a lestru cun su boe marinu e cun s'atteru, chi est appenas benniu a luche e chi lu an a muttire "Zabaione" pro more de una mantza groga in sa matta. Tottoi e sos amicos suos an a deper defender sos animales dae unu imprendidore americanu, chi punnat a sìche los picare chene perunu grabbu pro nche los ponner ind unu zoo privadu chi tenet in Florida.
Editziones[modìfica | modìfica su còdighe de orìgine]
Pèri tottu sos trettos de s'istadu italianu no si nd'at intesu tzinnu de s'anime, mentras chi fin bendias sas pelliculas in VHS pèri sos Istados Unidos e sa Bretagna Manna. In su 2012, peròe, su filme lu an fattu bier in su teatru de sa comuna de Durgali; in ibe, sos dischentes sa 1a A de s'iscola media li an fattu s'addoppiadura puru in sardu e in italianu.
Curiosidade[modìfica | modìfica su còdighe de orìgine]
- Tottoi est a commo s'unicu anime a esser ambientau in Sardigna.
- Cala Gonone si podet reconnoscher bene, ca a pellicula est fatta tenende fide meda a sa realtade. Si poden fintzas pompiare prodottos e costummenes, palattos e adderettura carchi barca turistica chi est galu in impreu.
- De Tottoi bi an fattu unu videojocu educativu in sos annos '90 pro imparare menzus sa grammatica inglesa.