Anghelu Caria

Dae Wikipedia, s'entziclopedia lìbera.
Jump to navigation Jump to search

Nùgoro-Istemma.png
Articulu in nugoresu
Nùgoro-Istemma.png

Ànghelu Caria est naschidu in Nùgoro su 19 de Maju de su 1947 e est istau unu poete e indipendentista sardu.

Biografia[modìfica | modìfica su còdighe de orìgine]

Est crèschiu in Roma, in ube sa famillia sua fit emigrada in sos annos baranta. Su babbu, Efisiu, fit militante de su Partito Comunista Italiano, fit istau in su Partito Comunista di Sardegna, in su C.L.N. sardu e che l'aiat pissichiu su regime fascista. Fortzis pro more de s’imparu de su babbu, Anzelu s’est iscrittu cando fit galu meda zovanu a sa F.G.C.I., ma nd’est essiu a pustis de pacos annos ca fit contrariu a sa politica revisionista de su P.C.I. At istudiau literadura in s’Universidade “La Sapienza” e est istau unu de sos militantes prus attivos de su movimentu de sos istudentes de Roma. Fit semper presente in sas manifestatziones, apunteddandesi in sas brigas contr’a sas troppas fascistas cando custos falaban a sas prattas pro minettare e pesare abolotu.

In su 1968 at fundau paris chin ateros s’organizzatzione marxista-leninista Stella Rossa e su giornale chi si muttiat a sa mantessi manera. Custu gruppu fit connotu pro su chi est capitau in Roma in cuss’annu e mascamente pro sa gherra contr’a sa zustissia a curtzu a sa facoltade de Architettura.

In su 1972, cando s’est laureau, si ch’est andau dae s’Italia e dae s’organizzatzione in ube fit militande pro torrare in Sardigna e at cumintzau a traballare comente insegnante prima in Thiniscole e a pustis ind un iscola de Nugoro. Giae cando fit in Italia aiat istudiau meda s’istoria e sos problemas de sa Sardigna e si fit interessau a sos gruppos indipendentistas chi bi fin in cust’ isola in sos annos sessanta. At cumpresu chi sos traballadores sardos sun isfruttaos duas bortas, comente traballadores e comente sardos, e pro custu at uniu sas ideas comunistas suas chin cussas indipendentistas e anticolonialistas e at cumintzau a traballare politicamente paris chin sos chi gherraban in Sardigna contr’a su colonialismu italianu.

In su 1973 est naschiu su giornale marxista e anticolonialista Su Populu Sardu e a pustis de pacu tempus su movimentu. Sas gherras prus importantes chi at cumintzau in cussos annos e at sichiu pro tottu sa bida sua naschin pro su bisonzu de autodeterminatzione de su popolu sardu. Partinde dae cust’idea at picau unu caminu chi l’at battiu a pessare sa lotta politica comente una lotta de liberatzione natzionale dae s’istadu italianu; solu cumprendende custa manera de pessare sa politica e sa Sardigna si poden cumprendere tottus sas peleas chi an cumintzau issu e sos atteros indipendentistas in cussos annos: contr’a su colonialismu linguisticu, economicu e sotziale; contr’a s’occupatzione militare; contr’a su modellu de "isviluppu" industriale chi at battiu s’istadu italianu ‘sende azudau dae sa Borghesia Compradora, sa classe sotziale chi, in Sardigna comente in tottucantas sas colonias, servit a s’istadu pro mediare su potere coloniale. Anzelu, paris chin atteros militantes, in cussos annos an fattu un iscola politica de Su Populu Sardu, chi b’est istada in Nugoro paritzos annos, e in sos cursos de cuss’iscola chi faveddaban de marxismu e mascamente de s’analisi marxista de sa “Questione Nazionale” si sun formaos politicamente medas zovanos nugoresos.

In su 1976 est andau in Bretagna chin sa delegatzione de Su Populu Sardu chi at firmau sa Carta de Brest , e in custa Carta, pustis de aer fattu un’ analisi de su carattere coloniale chi s’imperialismu picat isfruttande medas natziones chene istadu europeas, sas organizzatziones de sa manca indipendentista de sos populos oprimios de Europa promitian de sichire rapportos de solidariedade intr’e issas, pro fravicare un’Europa sotzialista de populos liberos e indipendentes. An firmau custa Carta sos partidos indipendentistas galegos, bretones, occitanos, irlandesos, gallesos, bascos e cadalanos. Dae cussu mamentu sun istaos semper prus mannos sos cuntattos de sos indipendentistas sardos chin cussos de atteros populos oprimios, chi a pustis sun istaos meda importantes chin sos movimentos cadalanos, bascos e mascamente chin sos corsos.

In cuss’ annu mantessi Su Populu Sardu, paris chin sos giornales Natzione Sarda, Sa Sardigna, Sa Republica Sarda e Sardegna Europa, at cumintzau a cullire sas firmas pro sa “proposta di legge d’iniziativa popolare per la tutela della lingua sarda e per il bilinguismo”. Bell’’e tottus sos partidos italianos de destra e de manca fin contrarios a custa pelea, calicunu fintzas chin documentos ufitziales comente su P.C.I. cando “su segretariu de sa federatzione de Nugoro l’at mandau una circolare a tottus sos segretarios de sas setziones nandeli de traballare contr’a custa pelea”.(cit. Gianfranco Contu, La questione nazionale sarda,. Quartu Sant’Elena, Alfa Editrice,1990 ) Sas firmas chi bisonzaban, che las an cullias e sa proposta de leze est arribada a su cussizu regionale, ma no l'ana mai approvada. Oje, fintzas si su cussizu regionale at approvau in su 1997 sa lezze 26 pro sa tutela de sa limba sarda, su sardu no est impreau bell’’e nudda in sas iscolas, in sos ufitzios publicos e in sos media e pro custu sos chi faveddan sardu, chi sun galu sa parte prus manna de sos sardos, sichin a essere discriminaos (bies limba sarda). Su Populu Sardu in cussos annos est crèschiu meda, diventande su movimentu prus importante de sa manca anticolonialista e indipendentista sarda, e in s’acabbu de sos annos settanta teniat militantes meda e fit presente in tottu sa Sardigna e in sas tzitades inube bi fin medas emigraos sardos in Italia e in atteros istados.

Anzelu Caria colabat sa bida sua traballande pro sa passione de sa politica o chin sa famillia sua, o zirande tottu custa terra in macchina, a pedes o in barca pro connoschere sa natura e s’istoria de Sardigna e sos probleamas, sas contraditziones e sa bellesa de custu popolu.

In su 1979 Su Popolu Sardu s’est candidau a sas eletziones regionales paris chin su Partidu Sardu. in sa lista Libertade Socialismu. In cuss’annu mantessi su movimentu est acabbau ca bi fin brigas intr’’e sos chi cherian organizzare Su Popolu Sardu comente unu partidu e sos chi fin contrarios e ca calicunu dirigente si ch’est essiu pro intrare in su P.S.d’Az.

In su 1982 ind unu cungressu in Nugoro, in sa Biblioteca Satta, inube si fin addobiaos sos chi fin de Su Popolu Sardu e atteros movimentos comente Sa Republica Sarda, Sardigna Emigrada, Ajò e su gruppu Sardenya y llibertat de S’Alighera, est istau fundau su partidu Sardigna e Libertade chi in cussos annos at gherrau fintzas contr’a sa repressione, dande solidariedade a sos presoneris politicos indipendentistas chi fin accusaos de eversione contr’a s’istadu.

In su 1984 est naschiu su Partidu Sardu Indipendentista chi at sichiu sas gherras de sos movimentos chi bi fin istaos prima comente sa gherra pro sa limba sarda ufitziale, contr’a s’occupatzione militare de sa Sardigna e pro difendere s’ambiente contr’a sos chi cherian prenare sas costas de tzimentu e contr’a sas petrolieras chi colaban in s’istrettu de Bonifacio. Custa pelea l’an fatta impare chin sos indipendentistas corsos, chin manifestatziones in Lungoni e in Bonifacio e manifestatziones in mare chin sas barcas.

In su 1988 est naschiu su periodicu iscrittu in duas limbas LIBERTADE!, giornale de su partidu, chi at acabau de issire in s’incumintzu de sos annos novanta e Anzelu Caria at iscrittu medas articulos in custu giornale. Intr’’e sos giornales inube at iscrittu bisonzat de ammentare Chidas e su periodicu de satira politica Su Raju.

In su 1994 at fundau, paris chin atteros, su movimentu indipendentista Sardigna Natzione, pessande chi pro irmanniare sa gherra de liberazione natzionale bisonzabat de fravicare unu movimentu indipendentista mannu chi aret mòghiu tottus sas fortzas organicas a sa nazione sarda. Sa paragula chi podet menzus riassumere sas gherras politicas de cussos annos est autoguvernu: S’autoguvernu fiscale diat azudare sos cumpartos economicos traditzionales, mascamente su pastoriu e su massariu e facher naschire un industria chi diat trasformare sas risorsas chi bi sun in Sardigna. Est istau issu su primu a narrere chi s’istadu italianu furabat a sa Sardigna su dinare de sas tassas chi depiat essere de sa Regione Autonoma comente est iscrittu in s’istatuto regionale, sa pelea chi a pustis an muttiu sa “vertenza entrate”. S’autoguvernu de su territoriu diat difendere sos benes culturales e ambientales de Sardigna isseperande unu turismu chi aret rispettau s’ambiente e chi non ‘seret istau in manos a sos ispeculadores istranzos. S’autoguvernu de sos trasportos diat isviluppare su commercio e sos rapportos chin sos atteros populos de su Mediterraneu. In cuss’annu mantessi Sardigna Natzione s’est alleada pro sas eletziones chin su P.S.d’Az. e sos Birdes chind unu risultau bonu e Anzelu est istau eleziu cussizeri comunale de Nugoro.

Issu aìat progettau de fachere sa Domo de Cumone de sos Sardos chi depiat essere unu fronte de sos partidos sardos contr’a sos partidos italianistas.

A pustis de una bida de gherras pro difendere sos dirittos de su populu sardu, chene si pasare mancari fit semper prus maladiu, Anzelu Caria est ispirau in su 24 de Frevarju de su 1996. Teniat 48 annos.

Su ch'at iscrittu[modìfica | modìfica su còdighe de orìgine]

Anghelu Caria at iscrittu poesias medas. Las at iscrittas in italianu, francu una paja in sardu, e faveddan de sa chi fit sa manera sua de pessare sa bida, sa politica e sa Sardigna chind un istile craru e meda evocativu. Sa muzere las at cullias e sa famillia at imprentau sa raccolta Poesie in su mese de Aprile de su 2010.

Medas còntan de sa repressione de s'esercitu e de sa politzia italiana in Sardigna, e s'isperu de poder una die bier una Sardigna libera:

« Scendevano come lupi / dai camion verdi / fermi su strade antiche /

ringhianti come cani / si sguinzagliavano / per le vie del paese / affamati. Nel cerchio della piazza / contro muri fangosi/ vecchi / sfatti / gli uomini poggiavano/ mani e corpi / con un abitudine antica / rassegnata e rabbiosa. Anche il giornale che ne parlava / trafiletto di parole / aveva in sé / la calma / di gesti conosciuti / abituali. Seduti al caffè / turisti / bevevano vernaccia e ghiaccio. Anch’io / facevo / cose di tutti i giorni / ma la mattina / era fredda / così la mente / il cuore / ed i gesti usuali / soliti nell’impotenza / eran fredde meridiane / di un vecchio segna tempo. Com’ eravamo insieme / io e il mio sudore.

Ed è inutile correre / per spaccasi la testa sulle rocce / si deve aspettare l’apertura / e preparare / il rumore secco / del piombo per cinghiali. »
« Io ti sogno / Sardegna mia / libera e rossa.

E so che dai monti / nasceranno i fucili / del nostro sangue. Nasce l’agnello sulle rocce / e cosi nasce il sudore / del mio popolo che muore di sete. Ci sappiamo italiani / cacciati / ma la nostra rabbia sa accendere il sole / nei rocciai / schiena della terra / scorre il canto del nostro amore. Cara mia / tra gli elci secolari / nei viottoli de sas costas / nella miseria bella pulita / il fronte unito / dei miei lontani / di oggi / nella mia gente / vive. Ma per capirmi / devi guardare tra le righe / occhi sudati / e sangue nell’erba / schiavi nati liberi / e occhi sottomessi / e tu mi capisci / con gli occhi dei mufloni / pochi rimasti sulla mia terra. Come fiamma vola la vendetta / ed io so cosa posso fare / per voi /

miei cari sotto terra. »

At iscrittu fintzas su romanzu istoricu Ardaolè chi contat de de un'insurretzione indipendentista in Sardigna in sos annos a pustis chi sa rivolutzione sarda at pèrdiu e Angioy si ch'est andau in esiliu in Frantza, e est ispirau a s'isbarcu de sos patriotas Frantziscu Cilocco e Sanna corda in Gallura in su 1802. Galu non che l'an pubricau.