Movimentu Armadu Sardu
Articulu in logudoresu
Su Movimentu Armadu Sardu (in italianu: Movimento Armato Sardo; acronimu: MAS) est istadu unu movimentu terroristicu de ideologia comunista e indipendentista attivu in Sardigna dae su 1983 a su 1985.
Ideas economicas e indipendentistas[modìfica | modìfica su còdighe de orìgine]
Sighende su pensamentu de Giangiacomo Feltrinelli, chi bolìat fagher de sa Sardigna sa Cuba de su Mare de Mesu, sa truma cherìat aunire sa pelea de classe comunista cun su movimentu indipendentista sardu, apparitzende attentados contra a sas fortzas armadas italianas chi bi aìat in Sardigna e contra sa propriedade de sos cusìnos (burghesos) italianos e fintzas sardos, chi a parrer de su MAS tenìan sa culpa de isfruttare sa terra e sos traballadores sardos.
Fattias biolentas[modìfica | modìfica su còdighe de orìgine]
Su MAS at postu sa firma sua a paritzas bocchiduras, duos secuestros de persone (unu de sos cales in Latziu) e tambene attentados ponende bombas. Sa prima bocchidura est in su 15 de lampadas de su 1983, cando duos mortores intran ind unu tzilleri de Mamujada e pigan a fusiladas su mere Claudio Balia, 22 annos, frade de Pietro (chi an mortu in su 1984) e de Alberto (issu puru mortu ind unu attentadu in Marsiglia in su 1991). Calchi die a pustis nche morin a su carnasseri Gonario Sale, cojuadu cund una fradile de Balia, a chirriu de unu cuile suo in sas campagnas de Mamujada; sos de Balia fin in intro de medas bocchiduras e secuestros. In su 5 de triulas, morin a Giovanni Bosco, chi benìat dae Benevento, bocchidu a curtzu de s'istatzione de benzina a chirriu de Durgali. Poi, naran chi fin issos a nche àer mortu a duos pastores mamujadinos, sos frades Giuseppe e Giovanni Debuggias, bocchidos in su mese de frearzu de su 1982 e in su de martzu de su 1983 in sos cuiles issoro. Tando secuestran a sa familia Buffoni-Mulas, muzere e amoradu: a pustis de los mandare in libertade, zirat unu bolantinu in ue su MAS ponet sa firma sua a sa bocchidura de su pastore Ciriaco Melas, mortu in Bitzi in su 6 de lampadas de su 1983. In su 19 de Sant'Andrìa de su 1983, an a secuestrare pèri a Anna Bulgari e a fizu suo Giorgio Calissoni, ispinghendesi a Latina (Latziu) in sas fattias issoro. Pro calchi crìmene de su MAS, sos giuighes an a cundennare in primu gradu a duas persones in su 1988 a 26 e a 7 annos de presone. In su 1993, peròe, sa Corte de Appellu nche at a furriare sa sententzia assolvende a ambosduos sos inculpados.
Libros[modìfica | modìfica su còdighe de orìgine]
- Paola Sirigu, Il codice barbaricino, La Riflessione (Davide Zedda Editore), 2007, pp.225-234.
- Giovanni Ricci, Sardegna Criminale, Newton Compton, 2008.
- Il Messaggero Sardo.