Lenardu de Alagon

Dae Wikipedia, s'entziclopedia lìbera.
Jump to navigation Jump to search

Flag of Sardinia, Italy.svg
Artìculu in LSC
Flag of Sardinia, Italy.svg

Lenardu de Alagon (in catalanu Lleonard II d'Alagó i Arborea) (Aristanis, 1436 – Xàtiva, 1494) est istadu s'ùrtimu marchesu de Aristanis.

Biografia[modìfica | modìfica su còdighe de orìgine]

Lenardu de Alagon fiat su primu de oto fìgios, nàschidos de Beneita Cubeddu de Arbarea sorre de su marchesu de Aristanis Sarbadore Cubeddu (chi fiat de s'iscratza de su giuighe Ugone II de Arbarea) e de su nòbile Artaldo Alagon i Luna, sennore de Pina de Ebro, Sástago e àteras biddas.

Artaldo, chi fiat de iscratza de is primos ricos hombres aragonesos, si fiat rebelladu a sa Corona: in su 1410, a cumandu de 4 naves impare a Cassiano Doria, aiat cunchistadu Lungoni, chi fiat difèndida de is aragonesos.

Lenardu de Alagon isposaiat cun Maria Linan de Morillo, chi ddi aiat dadu bator fìgios mascros e duas fèminas. Fiat nominadu marchesu de Aristanis in su 1469, a sa morte de su tziu Sarbadore.[1]

Marchesu de Aristanis e conte de sa Costera[modìfica | modìfica su còdighe de orìgine]

S'istema de is Alagon fiat illustradu aici: "de oru o de prata a ses bociuas de nieddu." Su marchesu Lenardu bi arunghiat "s'àrbure de birde irraighinadu."

Sa nominadura a marchesu, sende chi giai su babu aiat tentu cumportamentu rebellu, non fiat castiada de ogru bonu, e aiat agatadu luegus s'opositzione militare de su visurrei de Sardigna Nicolau Carròs (o Carroz in castellanu) de Arborea, sennore de Mandas e de Terranoa Pausània. Issu punnaiat a su possessu de su territòriu iscampiosu de su marchesadu, afirmende chi su testamentu de su tziu non podiat tènnere bàlida peruna, sende chi su re aiat detzìdidu in tempus cabudianu chi a sa morte de Cubeddu, su marchesadu e sa contea de Costera diant èssere acorpados a sa Corona de Aragona.

Su primu iscontròriu aiat tentu acuntèssida su 14 de abrile 1470, in intòrinos de Uras, in ue Alagon aiat prevalèssidu, intames de Carròs chi si fiat dèpidu retirare a Casteddu.[2]

In su 1474, cun su tratadu de paghe de Urgell, su re Giuanne II de Aragona (naradu Su Grandu), aiat reconnotu a Lenardu de Alagon su deretu de sutzessione, ma sa conduta intzulladora de Carròs aiat torradu a pesare sa gherra. Su visurrei custa borta no si fiat atrìvidu a acarare Alagon in logu abertu cun cumbatimentos, ma fiat andadu in Bartzellona e aiat cumbìntu su soberanu a sighire contra su marchesu, cun s'imputu de lesiada magestade, fellonia, cussighente cufiscadura de is fèudos e cundenna a morte.

Cun decretu de su 1477 su re aiat istèrridu duncas sa cundenna a sa famìllia Alagon intrega.[3]

Sa gherra si fiat ispainada fintzas a is zonas setentrionales, de in ue a Alagon is genovesos e su duca de Milano aiant promìtidu agiudos, chi però non fiant mai arribados, contrassempere a Carròs chi aiat otentu tropas armadas bene de Sitzìlia e Napoli.[4]

Sa batalla de Macumere[modìfica | modìfica su còdighe de orìgine]

Su 19 de maju 1478 s'esèrtzitu aristanesu fiat derrotadu definitivamente in sa batalla de Macumere. In antis de sa derrota, Lenardu aiat abandonadu su campu e, cun frades, fìgios e su visconte de Seddori si nche fiat fuidu a Bosa de in ue si fiat imbarcadu cun iscopu de lòmpere a sa Còrsica (chi fiat a su tempus poderiu de Genova).

A causa de una traitoria sa nave aiat però invèrtidu banda a manu de sa Sitzìlia, in ue fiant intregados a s'ammirallu Villamarin chi, intames de ddos dare a su visurrei de Sitzìlia ddos aiat ciùghidos a Bartzellona.[5]

Foto de su casteddu de Xàtiva

Presonia e morte de su marchesu[modìfica | modìfica su còdighe de orìgine]

In tempus afatante fiant postos in presone in su casteddu de Xàtiva, in ue Lenardu e Giuanne de Sena, visconte de Seddori, diant mòrrere in su 1494. Segundu s'iscritore Pietro Carboni, sa morte issoro fiat causada de s'amargura e de s'addolimentu morale mannu pro is acuntèssidas bìvidas: fiant interrados in su campu santu suta de terra de sa fortalesa de Xàtiva.[6]

Is parentes de su marchesu fiant imbetzes liberados pro òrdine de su re, ma non podiant torrare a Sardigna. De su 1481 su marchesadu fiat passadu a sa Corona e fiat guvernadu de unu funtzionàriu règiu.

Unu de is fìgios de Lenardu, Sarbadore, fiat resissidu noantamas a torrare a s'ìsula e pro mèdiu de sa coja cun Isabella Bejora Sivilleri, a balangiare rangu de conte de Biddesorris: s'aràntzia de pesada sua at a tènnere tìtulu de marchesos. Sa domo-fortalesa de is Alagon, sighit a èssere in die de oe su monumentu de interèssiu majore in Biddesorris.[7] De su frade de Lenardu, Frantziscu, ant a sighire medas inzènneros.

Cusseguèntzias de sa derrota[modìfica | modìfica su còdighe de orìgine]

Sa sutzessione sua rapresentaiat unu elementu de continuidade cun su giuigadu de Arborea, cosa chi no agradaiat a sa corona de Aragona. Segundu su cronista cadalanu Geronimo Zurita difatis, su re aragonesu no aprobaiat chi a sa morte de su marchesu Sarbadore Cubeddu, chentza de erederis, ddi sutzediat su nebode, cunsideradu duncas responsabile de is gherras chi fiat cussighidas.

Sa derrota de su marchesu Lenardu est cunsiderada che su fallimentu definitivu e s'ùrtimu tentativu de torrare a pesare in Sardigna una entidade istatale indipendente.

Su tìtulu de marchesu de Aristanis fiat assuntadu de is res de Aragona e in fatu a issos a is de Ispagna (chi sighint a ddu mantènnere).[8]

Notas[modìfica | modìfica su còdighe de orìgine]

  1. AA. VV., p. 102
  2. Carta Raspi, p. 220
  3. Cioppi, p. 68
  4. Cioppi, p. 69
  5. Carboni, La battaglia..., p. 39
  6. Carboni, Leonardo.., p. 80
  7. Serra, p. 35
  8. Scarpa Senes, p. 91

Bibliografia[modìfica | modìfica su còdighe de orìgine]

  • AA. VV., Giudicato d'Arborea e Marchesato di Oristano: proiezioni mediterranee e aspetti di storia locale, Aristanis 2000.
  • Proto Arca Sardo, De bello et interitu Marchionis Oristanei, a.c. di M.T. Laneri, Casteddu 2003.
  • Giovanni Boassa, Due battaglie che cambiarono il destino della Sardegna, Mògoru 2012.
  • Pietro Carboni, La battaglia di Macomer, romanzu istòricu, Tàtari 2013.
  • Id., Leonardo Alagon, 2 vol., romanzu istòricu, Tàtari 2013.
  • Raimondo Carta Raspi, Storia della Sardegna, Milano 1974, pp. 1004.
  • Go Casalis, Vittorio Angius, Dizionario Geografico Storico, Statistico, Commerciale Degli Stati Di S.M. il Re Di Sardegna, Kessinger Publishing, ISBN 978-11-682-6643-9, 2010, pp. 584.
  • Alessandra Cioppi, Battaglie e protagonisti della Sardegna medioevale, Casteddu 2008.
  • Franco Cuccu, La città dei Giudici, vol. I, Aristanis 1996.
  • Francesco Floris, ISBN 978-88-828-9263-0.
  • Carlos Sarthou Carreres, El castillo de Jàtiva y sus històricos prisioneros, Valencia 1951.
  • Arnaldo Satta-Branca, La Sardegna attraverso i secoli, Casteddu 1966.
  • Mirella Scarpa Senes, La guerra e la disfatta del Marchese di Oristano dal manoscritto di G. Proto Arca, Casteddu 1997.
  • Giovanni Serra, Villasor, <Parte Ippis>, Patiolla 1995.

Artìculos ligados[modìfica | modìfica su còdighe de orìgine]