Jeff Biggers

Dae Wikipedia, s'entziclopedia lìbera.
Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Jeff Biggers
Nàschida1963
Natzionalidadeamericana
Traballuistòricu, giornalista, drammaturgu e monologhista
Prèmios
  • American Book Award
  • David Brower Award for Environmental Reporting
  • Foreword Magazine Book of the Year Award
  • Lowell Thomas Award pro su Giornalismu de Biàgiu
  • Delta Award pro sa Literadura
  • Plattner Award pro sa Literadura Apalachiana
  • Illinois Arts Council Creative Non-Fiction Award
  • Garst Memorial Award for Media (UN Association Iowa)
  • Field Foundation Fellowship
  • Greener Planet Award" in su Festival de su Teàtru Planet Connections in New York
Gènere literàriusàgios istòricos e culturales, memòrias de biàgios, crònacas giornalistas, ispetàculos teatrales, monòlogos

Jeff Biggers (nàschidu in su 1963) est un'istòricu, giornalista, drammaturgu e monologhista americanu premiadu prus bortas pro sos libros suos.[1] Est s'autore e editore de deghe libros. Su libru suo prus reghente, In Sardinia: An Unexpected Journey in Italy, est un'istòria culturale e unu diàriu de biàgiu de s'ìsula.[2]

A parre de sa Yale Climate Connection, Biggers est "un'autore e ativista de primore chi iscriet meda subra de temas ambientales e climàticos", faghende fatu-fatu esibitziones e cunferèntzias in festivals, teatros, cunferèntzias, universidades e iscolas in totu sos Istados Unidos.

Comente fundadore de su Progetu Climate Narrative[3], at fatu su traballu de drammaturgu de narrativa climàtica in residèntzia in s'Universidade de s'Indiana Northwest, iscritore in residèntzia in s'Ufìtziu pro sa Sustenibilidade in s'Universidade de su Iowa e iscritore illustre Campbell-Stripling in residèntzia de su Wesleyan College in Geòrgia.[4] Comente parte de su traballu suo de narratzione subra de su clima, Biggers est s'autore e intèrprete de sos "Ecopolis Monologues", in ue immàginat modalidades pro initziativas urbanas regenerativas.[5] Adatados a sas initziativas e a s'istòria locales, sos monòlogos de Ecopolis sunt istados rapresentados in cunferèntzias, universidades e locales de teatru in totu s'Amèrica.[6]

In su 2008, Biggers at iscritu una sèrie de artìculos chi pedint una Polìtica Birde Noa.[7] Comente nebode de unu minadore de carbone de s'Illinois meridionale, Jeff Biggers est istadu unu crìticu vocale de s'iscucurada de sos montes in sas Apalàchias, de sas minieras a s'abertu in totu sa natzione, de sa pagu aplicatzione de sas leges in contu de s'antracosi, de sa seguresa in sos logos de traballu de sas minieras, e de sa farsidade de sos islogans subra de su "carbone netu". Sas crònacas e sas relatas de Biggers dae sas regiones mineras de carbone in totu su mundu sunt istados collidos in su situ web "Reckoning in Appalachia".[8]

Carriera de iscritore[modìfica | modìfica su còdighe de orìgine]

Libros de sagìstica[modìfica | modìfica su còdighe de orìgine]

Cuntzentradu subra de sas regiones marginalizadas e su recùperu de istòrias cuadas, Biggers at iscritu istòrias culturales, memòrias de biàgios e crònacas giornalìsticas basados in Apalàchia, in sos Istados Unidos Otzidentales Mèdios, sos logos de làcana intre sos Istados Unidos e su Mèssicu, su Mèssicu, s'Ìndia e s'Itàlia.

The United States of Appalachia[modìfica | modìfica su còdighe de orìgine]

Publicadu in su 2006, The United States of Appalachia (Istados Unidos de Apalàchia) argumentat chi, in prus de sa mitologia sua in s'immaginatzione americana, s'Apalàchia est istada pro tempus meda una regione de avanguàrdia in sos Istados Unidos - una bàntzigu de sa libertade e de s'indipendèntzia de sos Istados unidos, e una mamaja de literadura e mùsica. Unas cantas de sas innovatziones, rebelliones e movimentos sotziales americanos de importu prus mannu e atrividos sunt essidos a campu dae unu tretu fatu-fatu istereotipadu comente unu logu curiosu e arretradu, narat, e in custu protzessu, sos immigrados de sa diàspora apalachiana sunt divenidos unos cantos de sos òmines mannos prus famados de s'Amèrica.[9] S'Asheville Citizen-Times l'at retzensidu comente "un'òpera manna de s'istòria populare... sas rivelatziones abbundant". Unu retzensore at naradu chi su libru est "prenu de intuitziones istòricas... sa ghetada a terra de sos istereòtipos est una de sas motivatziones chi sunt a sa base de s'iscritura de Biggers".

In the Sierra Madre[modìfica | modìfica su còdighe de orìgine]

Iscritu in su 2006, In the Sierra Madre (In sa Sierra Madre) est unu libru de ammentos e un'istòria narrativa sagìstica chi contat sa vida e sos tempos in una de sas regiones prus famadas, ma disconnotas, de su mundu. Basadu subra de s'istòngiu suo de un'annu in mesu de sos nativos Rarámuri/Tarahumara de su Mèssicu, Biggers at esaminadu sas costumàntzias de una cultura indìgena resiliente in sas Amèricas, sas fainas de sos montagninos messicanos, e sa parada de argonàutas e biagiadores atzidentales chi ant biagiadu in sa Sierra Madre durante sos sèculos. Dae sos esploradores africanos, frades boèmios, disertores de gherra cunfederados e irlandesos, poetas frantzesos, repartos de sordados boeros e russos, comunidades ocultas apache e menonitas, archeòlogos ispantados, iscritores confusos e personàgios legendàrios che a Antonin Artaud, B. Traven, Sergei Eisenstein, George Patton, Gerònimu e Pancho Villa, Biggers chircat sos ascusòrgios legendàrios de sa Sierra Madre (su Gorropu de su Ràmene de su Mèssicu). In sa Sierra Madre at bintu sa Medalla de Oro in su prèmiu Book of the Year (Travel Essays) de sa rivista Foreword in su 2006, e su prèmiu Illinois Arts Council Nonfiction Award. Booklist at definidu su libru de ammentos "un'istòngiu ispantosu" in su 2006. In su 2011 l'ant bortadu a su frantzesu.[10]

Reckoning at Eagle Creek[modìfica | modìfica su còdighe de orìgine]

Iscritu in su 2010, Reckoning at Eagle Creek: The Secret Legacy of Coal in the Heartland (Serrada de sos contos in Eagle Creek: s'Eredade segreta de su carbone in s'Heartland) est una saga de famìlia, in parte memòrias, istòria culturale e indàgine giornalìstica, chi esàminat s'impatu de sa minadura de su carbone in sa regione de nàschida de Biggers, in s'Illinois meridionale. Su libru analizat sa pèrdida de sa tanca de sa famìlia sua de 200 annos pro neghe de sa minadura a s'abertu, e s'impatu istòricu parallelu de sa minadura de carbone subra de sas comunidades e de s'ambiente issoro. At bintu su prèmiu David Brower de su Sierra Club in su 2010, e su prèmiu Delta pro sa literadura. Torrende cun su pensamentu a s'isghelada de sos nativos americanos, su libru ligat s'istòria de sa famìlia de sos Biggers, includende su degòlliu de sa comunidade istòrica issoro de 200 annos in sas forestas Shawnee in s'isvilupu de s'indùstria de su carbone, s'iscravesa africana e s'estratzione de su carbone, s'istòria de sa seguresa de su logu de traballu e sas cumbatas sindacales, e sos movimentos ambientales e patrimònios contra a s'estrale e a sas impiantos de carbone. Publishers Weekly l'at definidu "in parte narratzione istòrica, in parte memòrias de famìlia, in parte innu pastorale ein parte geremìade contra a s'abusu de sa terra e de sos òmines chi ant dadu e sighint a dare sa vida issoro a (e a s'ispissu pro) sas minas, [Reckoning at Eagle Creek] ponet una cara umana subra s'indùstria chi providit belle sa metade de s'energia de s'Amèrica...at oferidu una prospetiva istòrica rara subra de custa indùstria vitale ma pagu cunsiderada, paris cun una crìtica devastadora de su mitu de su 'carbone netu'".[11]

State Out of the Union[modìfica | modìfica su còdighe de orìgine]

Publicadu in su 2012, Publishers Weekly at isseberadu State Out of the Union: Arizona and the Final Showdown Over the American Dream (Istadu foras de s'Unione: S'Arizona e sa Batalla Finale Subra de su Bisu Americanu), comente unu de sos mègius deghe tìtulos in sas Sièntzias Sotziales. Kirkus Reviews at descritu "State Out of the Union" comente "magistrale in sa dimustratzione de comente su tempus coladu est pròlogu... Unu libru puntuale, mescamente cun sa polìtica migratòria chi est tenende unu ruolu de importu in sa campagna presidentziale imbeniente". In sa retzensione de "State Out of the Union", Progressive Magazine at naradu: "su tìtulu de sa crònica de Jeff Biggers de s'Arizona, State Out of the Union, èvocat in manera adata sas paràulas pistighingiosas de Lincoln a su cumintzu de sa Gherra Tzivile... Sa letzione de Biggers pro sos letores suos est chi in totu su sèculu de turbulèntzia, sos tziclos de cunflitu de s'Arizona si movent in una trajetòria progressista. ] Mancari meda movimentos polìticos apant fatu raighinas in s'istadu, sos caminos chi sas cumbatas issoro in manera colletiva faghent pro su paisu a sa fine andant cara a sa liberatzione". Un'àteru crìticu at naradu: "Pro Jeff Biggers su chi sa polìtica migratòria de custu paisu diat dèpere èssere est craru comente un'àera chene incuinamentu, chene ismog, e abba cristallina, chene produtos chìmicos. Biggers, un'autore, giornalista, contadore de istòrias e drammaturgu, no est tìpicu, però. Sa connoschèntzia sua e sos iscritos suos subra temas de tendèntzia vitales... si sunt isparghinados meda. Est unu sustenidore atentu. At sighidu e s'est unidu a su movimentu de immigrantes in Arizona in antis e a pustis de sa formatzione de su SB1070".

Trials of a Scold[modìfica | modìfica su còdighe de orìgine]

Publicadu in su 2017. Trials of a Scold: The Incredible True Story of Writer Anne Royall (Proas de unu rimpròveru: S'incredìbile istòria bera de s'iscritora Anne Royall) est istadu nominadu pro su PEN/Jacqueline Bograd Weld Award for Biography (2018), e contat sa vida e sos tempos de s'iscritora e iscandalista Anna Royall.[12]

Resistance: Reclaiming an American Tradition[modìfica | modìfica su còdighe de orìgine]

Iscritu in su 2018, Resistance: Reclaiming an American Tradition (Resistèntzia: Recuperare una traditzione americana) est una "istòria de resistèntzia intelletuale e morale in sa polìtica americana", a parre de Kirkus Reviews. Includet retratos de figuras nativas americanas e de de sos primos annos de s'Amèrica, e s'eredade americana de resistèntzia a s'autoridade frassa pro sos deretos tziviles, sos deretos de sas fèminas, sos deretos de sos immigrados, s'amparu de s'ambiente, sa libertade de espressare. In un'intervista cun PEN American, Biggers at naradu: "In su tratamentu de sas chistiones prus traballosas de cada generatzione, sa resistèntzia a s'autoridade tzivile frassa e a sos agiudadores suos de sas aziendas at definidu s'istòria nostra americana pro etzellèntzia". Su crìticu sotziale Jeff Chang at definidu custu libru unu "sàgiu poderosu e urgente".

In Sardinia[modìfica | modìfica su còdighe de orìgine]

Publicadu in su 2023[13], In Sardinia (In Sardigna) est un'istòria culturale e unu diàriu de biàgiu basadu subra de s'istòngiu de Biggers in Sardigna, e de sos biàgios suos in s'ìsula. Kirkus Reviews at definidu su libru "unu biàgiu ammajadore". A parre de Frances Mayes, autore de su libru "Under the Tuscan Sun", e de bestsellers de su New York Times: "In fines, un'acumpangiamentu mannu a s'ìsula misteriosa e incantadora de Sardigna. Connòschida dae sa parte manna de sos biagiadores pro sas prajas suas, su patrimòniu archeològicu cumplessu de sa Sardigna arribat finas a sos tempos neolìticos. Jeff Biggers, su biagiadore/istudiosu espertu, partit in sa bella S'Alighera e incumintzat a esplorare s'ìsula intrega, intrende a fundu in sas traditziones ricas de sa mùsica, sas artes, sos dialetos, sos artesanos e sa literadura. Peri su caminu issoro, issu e sa famìlia sua s'ispàssiant cun sas traditziones, sas festas, su màndigu e su binu locales. Iscritu cun passione e amore, In Sardigna est su libru chi mi m'apo a batire in fatu in sos biàgios de su benidore". S'iscritore e antropòlogu Fiorenzo Caterini l'at definidu "un'òpera de primore: in su sensu de òpera chi, a parre meu, serrat in manera definitiva s'època de una mirada esterna ebbia e nde incumintzat un'àtera, una mirada chi, non podende èssere interna de su totu est, però, ultres a netu dae pregiudìtzios, "Impignada" finas a su lìmite de sas fortzas de s'ispìritu".[14]

Ispetàculos de palcu[modìfica | modìfica su còdighe de orìgine]

Biggers est fintzas unu drammaturgu e intèrprete de monòlogos. Est aparèssidu in campus e in tzitades in totu sos Istados Unidos, realizende adatamentos de sos monòlogos suos "Ecopolis".[15] At trasformadu medas de sos libros suos, intre sos cales In the Sierra Madre e State Out of the Union, in ispetàculos de monòlogos.[16] In Itàlia, At co-fundadu su Mare Nostrum Theatre Project[17] e at traballadu cun Teatroaperto[18] e àteros grupos de teatru italianos.[17]

Across the Stones of Fire[modìfica | modìfica su còdighe de orìgine]

Sa prima òpera sua, 4 1/2 Hours: Across the Stones of Fire (41⁄2 Oras: Peri sas pedras de Fogu), esplorat su destinu de una famìlia minetzada dae un'operatzione imbeniente de minadura a s'abertu in sa comunidade issoro. S'ispetàculu at fatu unu giru natzionale in su paisu e est aparèssida in Off-Broadway in su teatru Gene Frankel in New York dae su 4 a su 13 de làmpadas de su 2010.[19]

Damnatio Memoriae[modìfica | modìfica su còdighe de orìgine]

S'ispetàculu publicadu suo, Damnatio Memoriae: A Play, Una Commedia, (2015) est istadu descritu dae s'autore Rilla Askew comente "un'esaminada atemporale de sos deretos umanos, sa dignidade umana, e su chi cheret nàrrere èssere unu "tzitadinu", s'ispetàculu rivelat istòrias ismentigadas in su mentres chi faghet bìvere sas dudas de su mundu nostru modernu, ammentende·nos chi, in medas maneras, sunt sa matessi cosa". S'ispetàculu l'ant produidu in Bologna e in Firentze, in Itàlia, in su 2017 e su 2019.[20]

Kaminski's Lot[modìfica | modìfica su còdighe de orìgine]

Kaminski's Lot (Su Lotu de Kaminski), cummissionadu dae s'Universidade de s'Indiana Northwest, tratat de su càmbiu climàticu e de sa giustìtzia ambientale. S'ispetàculu l'ant prodùidu in su Teatru Northwest in Gary, Indiana, in su 2021.[21]

Prèmios e ondras[modìfica | modìfica su còdighe de orìgine]

Biggers at bintu medas prèmios e onores, intre sos cales un'American Book Award, su David Brower Award for Environmental Reporting, su Foreword Magazine Book of the Year Award, su Lowell Thomas Award for Travel Journalism, su Delta Award for Literature, su Plattner Award for Appalachian Literature, unu Illinois Arts Council Creative Non-Fiction Award, su Garst Memorial Award for Media (UN Association Iowa), e una Field Foundation Fellowship. Est editore e contributore de The Bloomsbury Review, e est unu membru de su PEN American Center. S'òpera sua, "4 1/2 Hours: Across the Stones of Fire", at bintu su "Greener Planet Award" in su Festival de su Planet Connections Theatre in New York City, e est aparèssida in sos tzìnemas de totu su paisu. Sa rivista Blue Ridge Outdoors at isseberadu Biggers comente unu de sos 100 pionieres suos.

Libros[modìfica | modìfica su còdighe de orìgine]

  • (EN) Jeff Biggers, Don West e George Brosi, No lonesome road: selected prose and poems, Urbana, University of Illinois Press, 2004, ISBN 978-0-252-07157-7.
  • (EN) Jeff Biggers, In the Sierra Madre, Urbana, University of Illinois Press, 2006, ISBN 978-0-252-03101-4.
  • (EN) Jeff Biggers, The United States of Appalachia: How Southern Mountaineers Brought Independence, Culture, and Enlightenment to America, Emeryville (CA), Shoemaker & Hoard, 2006, ISBN 978-1-59376-031-1.
  • (EN) Jeff Biggers, In the Sierra Madre, Urbana, Univ. of Illinois Press, 2006, ISBN 978-0-252-03101-4.
  • (EN) Jeff Biggers, Reckoning at Eagle Creek: the secret legacy of coal in the heartland, New York, The Nation/Basic Books, 2010, ISBN 978-1-56858-421-8.
  • Huey Perry, "They'll cut off your project": a Mingo County chronicle, in West Virginia and Appalachia, prefatzione de Jeff Biggers, 2nd ed, Morgantown, West Virginia University Press, 2011, ISBN 978-1-933202-79-2.
  • (EN) Jeff Biggers, State out of the union: Arizona and the final showdown over the American dream, New York, Nation Books, 2012, ISBN 978-1-56858-702-8.
  • (EN) Jeff Biggers, Damnatio Memoriae: A Play, Una Commedia, San Antonio (Texas), Wings Press, 2015, ISBN 978-1-60940-461-1.
  • (EN) Jeff Biggers, The Trials of a Scold: The Incredible True Story of Writer Anne Royall, New York, St. Martin's Press, 2017, ISBN 9781250065124.
  • (EN) Jeff Biggers, Resistance: reclaiming an American tradition, First hardcover edition, Berkeley, California, Counterpoint, 2018, ISBN 978-1-64009-047-7.
  • (EN) Jeff Biggers, In Sardinia: Unexpected Journey in Italy, New York/London, Melville House, 2023, ISBN 9781685890261.

Riferimentos[modìfica | modìfica su còdighe de orìgine]

  1. ↑ (EN) Regenerative Appalachia: Storytelling And Songs Re-Envision Boone, North Carolina, in HuffPost, 30 trìulas 2017. URL consultadu su 25 santugaine 2021.
  2. ↑ (EN) IN SARDINIA | Kirkus Reviews. URL consultadu su 30 austu 2023.
  3. ↑ (EN) Climate change, environmental justice take center stage in Theatre Northwest’s ‘Kaminski’s Lot’, in Chicago Tribune, 1º santandria 2021. URL consultadu su 30 austu 2023.
  4. ↑ (EN) Climate Narrative Project | Jeff Biggers, in jeffrbiggers.com. URL consultadu su 25 santugaine 2021.
  5. ↑ Ecopolis Monologues Archiviadu su 30 abrile 2019 in s'Internet Archive."
  6. ↑ (EN) Regenerative Appalachia: Storytelling And Songs Re-Envision Boone, North Carolina, in HuffPost, 30 trìulas 2017. URL consultadu su 25 santugaine 2021.
  7. ↑ (EN) Beyond Race: Obama's Green Opportunity, in HuffPost, 20 martzu 2008. URL consultadu su 30 austu 2023.
  8. ↑ (EN) Reckoning in Appalachia, Reckoning in Appalachia, in Reckoning in Appalachia. URL consultadu su 25 santugaine 2021.
  9. ↑ (EN) Jon Elliston, From these mountains, in Mountain Xpress, 22 freàrgiu 2006. URL consultadu su 30 austu 2023.
  10. ↑ (FR) Jeff Biggers, Dans la Sierra Madre: une année chez les Tarahumaras, in Latitudes, tradutzione de Michèle Pressé, Paris, A. Michel, 2011, ISBN 978-2-226-21504-8.
  11. ↑ (EN) Amy Goodman, As Obama Pushes “Clean Coal,” Jeff Biggers Tracks History of Destructive Mining in “Reckoning at Eagle Creek: The Secret Legacy of Coal in the Heartland”, in Democracy Now!, 26 freàrgiu 2010. URL consultadu su 30 austu 2023.
  12. ↑ PEN/Jacqueline Bograd Weld Award for Biography 2018 Longlist, in Brilliant Books, 29 nadale 2017. URL consultadu su 25 santugaine 2021.
  13. ↑ (EN) In Sardinia by Jeff Biggers, in PenguinRandomhouse.com. URL consultadu su 30 austu 2023.
  14. ↑ (IT) Fiorenzo Caterini, Per capire l’Italia bisogna conoscere la Sardegna.In Sardinia, An unexpected journey in Italy.di Jeff Biggers. Recensione di Fiorenzo Caterini, in SardegnaBlogger, 19 austu 2023. URL consultadu su 30 austu 2023 (archiviadu dae s'url originale su 30 austu 2023).
  15. ↑ (EN) Shaping New Climate Narratives: Why a Journalist/Historian Turned to Theatre for Climate Stories, in Artists & Climate Change, 6 nadale 2018. URL consultadu su 30 austu 2023.
  16. ↑ (EN) State Out of the Union: Teaching for Change Hosts Jeff Biggers, in Teaching for Change, 9 santugaine 2012. URL consultadu su 30 austu 2023.
  17. ↑ 17.0 17.1 (EN) artsandclimate, Mare Nostrum Theatre Project in Italy, in Artists & Climate Change, 25 austu 2020. URL consultadu su 30 austu 2023.
  18. ↑ (EN) Beyond Mare Nostrum: Italian Theater Launches International Project for Immigration Stories, in HuffPost, 30 trìulas 2014. URL consultadu su 30 austu 2023.
  19. ↑ (EN) Charlie Piane, Coal Free Future Project Presents 'Across the Stones of Fire' 6/4-13, in BroadwayWorld.com. URL consultadu su 30 austu 2023.
  20. ↑ (EN) Damnatio Memoriae: a play / una commedia by Jeff Biggers and Carla Paciotto, in www.wingspress.com. URL consultadu su 12 cabudanni 2015 (archiviadu dae s'url originale s'8 freàrgiu 2016).
  21. ↑ (EN) Climate change, environmental justice take center stage in Theatre Northwest’s ‘Kaminski’s Lot’, in Chicago Tribune, 1º santandria 2021. URL consultadu su 30 austu 2023.

Ligàmenes esternos[modìfica | modìfica su còdighe de orìgine]

Controllu de autoridadeVIAF (EN) 25758948 · ISNI (EN) 0000 0000 7847 4530 · BNF (FR) cb155357908 (data) · GND (DE) 132256134 · LCCN (EN) n2003035603 · NTA (EN) 298337231 · OL OL226096A · SUDOC (FR) 119241234 · WorldCat Identities (EN) n2003-035603
Bogadu dae "https://sc.wikipedia.org/w/index.php?title=Jeff_Biggers&oldid=182182"