Natzionale sarda de Bocia/logudoresu

Dae Wikipedia, s'entziclopedia lìbera.
Jump to navigation Jump to search

Ozieri-Stemma.png
Articulu in logudoresu
Ozieri-Stemma.png

Sa Natzionale sarda de Bòcia est sa truma ufitziale de giogadores de pallone a rapresentare sa Sardigna. No est a pare a sa FIFA ma a sa CONIFA, cunfederatzione internatzionale pro totus sos populos, etnias e/o natziones chene istadu peri su mundu.

Istemma de sa Natzionale Sarda

Istoria[modìfica | modìfica su còdighe de orìgine]

Sas primas partidas amistosas[modìfica | modìfica su còdighe de orìgine]

Sa Natzionale Sarda fit naschida in su 1990. Tando, sa Natzionale Inglesa fit in Sardigna ca si fit preparende a giogare a sos Mundiales de Italia '90, in ue at a giogare, in Casteddu, contra s'Egitu e s'Irlanda duas de sas tres partidas in sos girones. Nde aìant pigadu sos menzus giogadores sardos, dae sa seria C e sos Diletantes, pro parare fronte a sos inglesos in sa proa pre-mundiale. Sos primos giogadores a si ponner sa màglia de sa Natzionale Sarda, suta de Mariano Dessì chi fit su daganu de sos allenadores sardos in cuddas dies, fint Nioi a sa porta, Spano, Moro, Bortolini e Tomasso in defensa, Francesco Marroccu (chi at a fagher su diretore de su Casteddu), Martinez, Tolu e Ennas in tzentru-campu, Corda e Gianfranco Zola, su solu professionista e tando giogadore de su Napoli chi aiat bintu s'Iscudetu. In sa segunda meidade de sa partida, fint intrados tambene Toffolon, Laconi, Carta, Nieddu, di Laura, Mura, Napoli, Fara e Angioni. Sa partida fit acabada 10-2 pro sos inglesos, chi fint meda prus fortes cun unu tiru de McMahon, una tripleta de Neil Webb e una de Peter Beardsley, una dopieta de Steve Bull e un'ateru tiru de David Platt. Nointames, Tomasso aìat signadu pro sa prima borta su primu gol in s'istoria de sa Natzionale Sarda.

Ateros sete annos fint colados, pro si torrare a bidere una iscuadra sarda in campu. In su mese de triulas de su 1997, in su Quadrivio de Nùgoro, gratzias a su dirigente nugoresu de su partidu sardista Sardigna Natzione Indipendentzia Francesco Cesaraccio, si fit apparitzada una partida in amigantzia de sas Natzionales de sas "isulas sorres", Sardigna e Còssiga. A diferentzia de s'atera borta in ue aiant giogadu diletantes, sa seletzione teniat sos menzus giogadores sardos professionistas chi bi fint tando. A fagher su Commissariu Tènnicu fit Gustavo Giagnoni, chi aìat postu in porta Gianfranco Pinna e Giuseppe Nioi. In defensa, bi fint Gian Battista Scugugia, Vittorio Pusceddu, Gianluca Festa e Salvatore Matrecano. In tzentru-campu, Pier Giovanni Rutzittu, Marco Sanna, Pietro Garau, Massimiliano Pani, Alessandro Manca, Igor Marziano e duos fizos de sardos in disterru: su sardu-tedescu Sergio Allievi e su sardu-olandesu Daniel Agus. In atacu, giogaìant Gianfranco Zola, Tomaso Tatti, Roberto Manca, Roberto Cau, Emanuele Matzuzzi e un'ateru disterradu, su sardu-belga Antonio Lai. Est de notare chi su porteri Nioi e Zola siant istados sos unicos chi ant cunvocadu cussa borta e s'atera puru, finende goi primatistas in sa classifica de presentzias. Sa partida, chi non teniat diferentzias mannas in contu de pratichesa, la aìant binta sos sardos pro 1-0 a su minutu de binti de su segundu tempus, cun unu gol de Zola.

Sas primas tentas pro si assotziare a libellu internatzionale[modìfica | modìfica su còdighe de orìgine]

S'istoria at fatu bider chi cussu giogu fit occasionale, e petzi undighi annos a pustis si fit torradu a chistionare de una Natzionale Sarda. Difatis, in su 2008 in Gonnos Giampiero Sogus, carraresu de babbu sardu e mama toscana, aiat fundadu sa Lega Federale Calcio Sardegna, sighende su modellu de sa Lega Federale Calcio Padania, trisinende umpare su sindigu de sa bidda comente vice-presidente, Sisinnio Zanda, comente consizeri s'albergadore Marco Sardu e comente segretariu s'abocadu Franco Loi. Sa Lega Sarda de bòcia fit iscrita deretu a s'NF-Board, chi tando apparitzaìat sas competitziones chi non faghìant parte de sa FIFA, comente sa VIVA World Cup. Mancari fit iscrita de manera ufitizale sa cunfederatzione mundiale, non si aìat giogadu una partida, mancu in amigantzia, si no pro unu torneu de diletantes in Toscana in ue Sogus aiat giamadu "Sardegna" un'iscuadra de giogadores chi fint totucantos toscanos.

FINS e s'iscritzione a sa CONIFA[modìfica | modìfica su còdighe de orìgine]

In su 2012, gratzias a s'impignu de su partidu ProgRes, sa Federatzione Isport Natzionale Sardu (FINS) naschit, cun sa punna de fagher seletziones sardas de fùbalu. Sas primas esperientzias sunt una truma de bòcia a 5, chi falat a campu gioghende in su 2012 e 2013 a Fordongiani e Nùgoro pro partidas in amigantzia cun sa Catalugna.

In cuss'annu, pro more de sa Temporada Cleopatra chi aìat fatu 19 vitimas, sa sotziedade sarda nde bogat a pizu sa bidea de fagher una partida pro collire dinare in azudu a chie nd'est rutu e pro torrare a fraigare sas biddas e tzitades in ue su tziclone aiat fatu dannu. Si nd'est aunidu in amparu a s'eventu Vittorio Sanna, tando radiocronista de su Casteddu pro s'emitente privada Radiolina, chi at mutidu paritzos sardos chi giogaìant comente professionistas. A su comintzu, si pensaìat a giogare in amigantzia contra su Casteddu etotu, ma su presidente Massimo Cellino no nde cherìat intender. Si aìat fatu calchi atera tenta, pro giogare contra sa Còssiga, e bi aìat fintzas una data pro su mese de maju de s'annu ch'intraìat, ma a sa fine non si nd'aìat fatu prus nudda.

Si depiant isetare ateros chimbe annos, pro chi su progetu andaret a logu in su 13 de Santu Gaine de su 2018, cando sa FINS aìat naradu de si affizare a sa CONIFA (Confederation of Independent Football Associations), organu internatzionale massimu pro su giogu de pallone non parte de sa FIFA, chi ponìat a pare totus sos Populos e/o Natziones chene Istadu. Sa CONIFA apparitzat, intra s'ateru, sa Copa de su Mundu CONIFA in logu de sa VIVA World Cup ammaniada dae s'estinta NF-Board. Impare a s'intrada in CONIFA, sa FINS at annuntziadu chi bolet partetzipare a sos Europeos de su 2019 in Artsakh. Sa chida a pustis, si benit a ischire chie fit su commissariu tènnicu nou, Bernardo Mereu de Triei, allenadore istorigu chi at ghiadu trumas in paritzos campionados professionistas e interregionales.

Sa prima partida de s'era FINS, sa de tres in s'istoria de sa Natzionale Sarda, si faghet in su 19 de martzu de su 2019 in s'istàdiu Franco Frogheri de Nùgoro contra sos "Istrangios de Sardigna", una truma cun sos menzus istranzos chi giogant in iscuadras sardas; sa partida la binchent sos sardos 7-1. In sa retza, Francesco Virdis de su Savona cun una tripleta, Daniele Molino de su Sanremese, Samuele Spano de su Budoni e Toni Gianni de su Latte Dolce (Tàtari). Pro s'ocasione, si fint giamados prus de 50 giogadores: sos professionistas peroe, in cunsideru de s'istajone sportiva, no aìant partetzipadu a sa fine. Tando sa rosa fit petzi de giogadores diletantes, francu duos de s'Alzachena e Robert Acquafresca (Sion) e Paolo Dametto (Feralpisalò).

Colores, simbulos e istemma[modìfica | modìfica su còdighe de orìgine]

Dae cando si nde occupat sa FINS, su colore printzipale est su birde giaru, nanchi "una appellida istoriga e auguriu a chi sa Sardigna torret, fintzas in su giogu de bòcia, a unu tempus de floridesa culturale e economica, gioghende e aberendesi in prima persona a su mundu".

S'istemma de sa Natzionale est un'iscudu cun elementos pigados dae sa cultura sarda. In sa parte de subra, campegiat s'iscritu "Sardigna" e "Natzionale de Bòcia". In sa parte printzipale si podent notare sos Bator Moros classicos, mancari in versione birde; in sa rughe de santu Giorghi bi at s'arbore irraighinadu, simbulu in prus de 80 biddas ca est cuddu de su Judicadu de Arbaree, ultimu istadu a rapresentare una Sardigna indipendente e libera.

In su primu atobiu contra s'Inghilterra de su 1990, su sardu de XI fit faladu in campu cun una màglia bianca cun detaglios e collete turchinos, cun sos caltzones de colore ruju. In sa segunda esperientzia de su 1997, sa truma fit totu ruja cun una bandera sarda manna in petus. In su 2018, si fint presentadas sas mallieddas ufitziales chi aìat fatu su sponsor tènnicu Eye Sportswear. Pro sa prima màglia, si aìat seberadu una divisa bianca cun detaglios birdes de diversa tonalidade e una trama chi iscobiat sos recamos tipicos de s'artesania sarda in sa parte tzentrale, colores chi benint dae su Regnu de Arbaree; pro sa màglia de trasferta, si at seberadu una divisa ruja cun revessu biancu, in onore sa bandera sarda.

Artìculos currelados[modìfica | modìfica su còdighe de orìgine]

Natzionale sarda de Bòcia (LSC)

Ligamenes esternos[modìfica | modìfica su còdighe de orìgine]